ملک کے بیشتر علاقے خشک اور سرد رہیں گے

اسلام آباد: محکمہ موسمیات نے اگلے چند دنوں کے دوران ملک کے بیشتر علاقوں میں موسم خشک اور سرد رہنے کی پیشگوئی کی ہے۔ محکمہ موسمیات کے مطابق پہاڑی علاقوں میں سردی کی شدت برقرار رہے گی، جب کہ پنجاب کے میدانی علاقوں میں اسموگ اور صبح و رات کے اوقات میں کچھ مقامات پر ہلکی دھند پڑنے کا امکان ہے۔

خصوصاً اسکردو میں سب سے کم درجہ حرارت منفی 7 ڈگری سیلسیس ریکارڈ کیا گیا ہے۔ گزشتہ 24 گھنٹوں کے دوران بھی ملک کے بیشتر علاقے خشک اور پہاڑی علاقے سرد رہے، تاہم پنجاب کے چند میدانی اضلاع میں ہلکی دھند چھائی رہی۔

لاہور کی فضائی آلودگی کی صورتحال بھی تشویش کا باعث بنی ہوئی ہے، جہاں ایئر کوالٹی انڈیکس 337 ریکارڈ کیا گیا ہے۔ اس وقت لاہور دنیا کے آلودہ ترین شہروں کی فہرست میں دوسرے نمبر پر موجود ہے۔ اسموگ اور فضائی آلودگی کے باعث لاہور کے شہریوں کو مشکلات کا سامنا ہے، اور محکمہ موسمیات نے احتیاطی تدابیر اختیار کرنے کی ہدایت کی ہے۔

پاکستان کے مختلف علاقوں میں سردی کی شدت میں اضافے کے ساتھ ساتھ فضائی آلودگی کی صورتحال بھی صحت کے لیے ایک بڑا چیلنج بن چکی ہے، جس کے اثرات خاص طور پر بچوں، بوڑھوں اور سانس کے مریضوں پر مرتب ہو سکتے ہیں۔