عالمی منڈی میں کمی کے بعد پاکستان میں سونا 14 ہزار 900 روپے فی تولہ سستا

کراچی: عالمی منڈی میں سونے کی قیمتوں میں کمی کے رجحان کے بعد پاکستان میں بھی سونا سستا ہو گیا ہے، جس کے نتیجے میں مقامی صرافہ بازار میں قیمتوں میں نمایاں کمی ریکارڈ کی گئی ہے۔

آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونے کی قیمت میں 14 ہزار 900 روپے کی کمی ہوئی ہے، جس کے بعد نئی قیمت 4 لاکھ 38 ہزار 36 روپے ہو گئی ہے۔

اسی طرح 10 گرام سونا بھی 13 ہزار 410 روپے سستا ہوا ہے، جس کے بعد اس کی نئی قیمت 3 لاکھ 74 ہزار 205 روپے مقرر کی گئی ہے۔

عالمی سطح پر بھی سونے کی قیمتوں پر دباؤ برقرار ہے۔ خبر رساں ادارے رائٹرز کے مطابق اسپاٹ گولڈ کی قیمت 0.8 فیصد کمی کے بعد 4,174.50 ڈالر فی اونس تک آگئی ہے، جبکہ امریکی فیوچرز میں بھی 1.2 فیصد کی کمی دیکھی گئی ہے۔

ماہرین کے مطابق امریکی ڈالر کی مضبوطی اور فیڈرل ریزرو کی سخت مالیاتی پالیسی سونے کی قیمتوں میں کمی کی بڑی وجوہات ہیں۔ تجزیہ کاروں کا کہنا ہے کہ بلند شرح سود کا تسلسل غیر منافع بخش سرمایہ کاری، خصوصاً سونے، کے لیے منفی اثرات پیدا کر رہا ہے۔

رپورٹ میں یہ خدشہ بھی ظاہر کیا جا رہا ہے کہ اگر یہی رجحان برقرار رہا تو عالمی مارکیٹ میں سونا مزید کم ہو کر 4 ہزار ڈالر فی اونس کی سطح سے بھی نیچے جا سکتا ہے۔

دوسری جانب ماہرین کا کہنا ہے کہ جیوپولیٹیکل حالات اور امریکہ میں مہنگائی سے متعلق آنے والی نئی رپورٹس سونے کی آئندہ قیمتوں کے تعین میں اہم کردار ادا کریں گی۔