مائیکرو سافٹ کا نیا منصوبہ: اے آئی ایجنٹس کو بھی منیجر کی ضرورت

نیویارک: سافٹ ویئر کمپنی مائیکرو سافٹ نے مصنوعی ذہانت (اے آئی) کو ایک نئی جہت میں متعارف کراتے ہوئے اعلان کیا ہے کہ کام کی جگہ پر صرف انسانوں کو ہی نہیں، بلکہ اے آئی ایجنٹس کو بھی انتظام کی ضرورت ہے۔ کمپنی نے حال ہی میں مائیکرو سافٹ ایجنٹ 365 کا آغاز کیا ہے، جو کمپنی کے صارفین کو 1.3 ارب اے آئی ایجنٹس کی نگرانی کرنے کی سہولت دے گا، جن کا اندازہ ہے کہ وہ 2028 تک دفتری کام خودکار بنا دیں گے۔

رپورٹس کے مطابق، مائیکرو سافٹ ایجنٹ 365 مصنوعی ذہانت سے چلنے والے پروگراموں کی نگرانی کے لیے ایک سسٹم فراہم کرتا ہے، جو انسانی کارکنوں کی طرح مختلف کام انجام دیتے ہیں۔ ان ایجنٹس کی بڑھتی ہوئی تعداد اور ان کے کام کرنے کے طریقے کو دیکھتے ہوئے، کمپنی نے اس بات کی ضرورت محسوس کی کہ ان ایجنٹس کے لیے بھی منیجر کی ضرورت ہوگی تاکہ یہ کام مؤثر اور محفوظ طریقے سے انجام پائیں۔

مائیکرو سافٹ اور دیگر کمپنیاں تیزی سے اس قسم کے ایجنٹ سافٹ ویئر کو مارکیٹ کر رہی ہیں، جنہیں مختلف کاروباری عملوں میں استعمال کیا جا رہا ہے۔ کچھ صارفین نے ان سسٹمز کو کامیابی کے ساتھ اپنے کاموں میں شامل کیا ہے، جیسے کہ کوڈ جنریشن، مگر بعض صارفین اسے نافذ کرنے میں مشکلات کا سامنا بھی کر رہے ہیں۔

کمپنی کا کہنا ہے کہ مائیکرو سافٹ ایجنٹ 365 اس طرح کام کرتا ہے جیسے آئی ٹی عملہ کمپنی کے نیٹ ورک کی نگرانی کرتا ہے، یعنی وہ یہ دیکھ سکتا ہے کہ کون ایجنٹ کہاں ہے، وہ کن وسائل تک رسائی رکھتا ہے اور اس کی سرگرمیاں کیا ہیں۔ اس کے ذریعے آئی ٹی اہلکاروں کو یہ اختیار ملے گا کہ وہ ’باغی‘ ایجنٹس کو الگ (قرنطینہ) کریں اور مجاز ایجنٹس کو مختلف پیداواریت کے ٹولز فراہم کریں۔

مائیکرو سافٹ کا دعویٰ ہے کہ اس سسٹم کے ذریعے ایجنٹس کی کارکردگی کو بہتر بناتے ہوئے کام کی جگہ پر خودکاریت کی سطح کو بڑھایا جا سکے گا، جس سے کاروباری عمل میں مزید تیزی آئے گی۔