فلپائن کے ساحلی علاقوں میں سمندری طوفان نے تباہی مچادی ، ہزاروں افراد نقل مکانی پر مجبور

منیلا : فلپائن کے ساحلی علاقوں میں سمندری طوفان نے تباہی مچادی ہے جس کے نتیجے میں تیز ہواؤں اور موسلا دھار بارشوں نے نظامِ زندگی مفلوج کر دیا ہے۔ مقامی حکام کے مطابق، طوفان کی شدت کے باعث تقریباً 27 ہزار افراد کو متاثرہ ساحلی علاقوں سے محفوظ مقامات پر منتقل کیا گیا ہے۔

محکمہ موسمیات نے خبردار کیا ہے کہ سمندر میں لہریں 6 فٹ تک بلند ہو سکتی ہیں اور کئی علاقوں میں سیلاب کا خدشہ بڑھ گیا ہے۔ طوفان کے سبب بجلی کی فراہمی بھی متاثر ہوئی ہے، جبکہ متعدد پروازیں اور کشتیوں کی آمد و رفت معطل کر دی گئی ہے۔

ایمرجنسی ریسکیو ٹیمیں الرٹ پر ہیں اور شہریوں کو ساحلی علاقوں سے دور رہنے کی ہدایت کی گئی ہے۔ حکومتی اداروں نے ریلیف کی سرگرمیوں کے لیے متاثرہ علاقوں میں امدادی کیمپ قائم کر دیے ہیں تاکہ فوری امداد فراہم کی جا سکے۔