پاک فضاعیہ کے جے ایف-17 تھنڈر بلاک تھری طیاروں پر مشتمل دستہ آذربائیجان پہنچ گیا

راولپنڈی : پاک فضائیہ کا ایک دستہ جدید ترین جے ایف-17 تھنڈر بلاک تھری لڑاکا طیاروں اور ماہر فضائی و زمینی عملے کے ساتھ آذربائیجان پہنچ چکا ہے تاکہ وہ دو طرفہ فضائی مشق "انڈس شیلڈ الفا" میں شرکت کرے۔ اس مشق کا مقصد دونوں ممالک کی فضائی افواج کے درمیان باہمی ہم آہنگی اور اشتراکی صلاحیتوں کو فروغ دینا ہے۔

پاکستانی طیاروں نے اپنی آپریشنل صلاحیت اور استقامت کا شاندار مظاہرہ کرتے ہوئے پاکستان سے آذربائیجان تک بغیر رُکے پرواز کی۔ اس دوران فضا میں ایندھن کی فراہمی کا پیچیدہ عمل کامیابی سے مکمل کیا گیا، جس میں پاک فضائیہ کے آئی ایل-78 ٹینکر طیارے نے انتہائی مہارت سے معاونت فراہم کی۔ یہ آپریشن پاکستانی فضائیہ کی طویل فاصلے تک کارروائی کرنے کی صلاحیت اور عملے کی پیشہ ورانہ مہارت کا بہترین اظہار تھا۔

مشق "انڈس شیلڈ الفا" میں جدید فضائی جنگی حربوں، مشترکہ منصوبہ بندی اور آپریشنل عمل کو موجودہ ٹیکنالوجی کے تناظر میں پرکھا جائے گا۔ اس میں حصہ لینے والے دونوں ممالک کی افواج کو ابھرتے ہوئے فضائی دفاعی چیلنجز سے نمٹنے اور مشترکہ ردعمل کی حکمت عملیوں کو مضبوط بنانے کا موقع ملے گا۔

آئی ایس پی آر کے مطابق، اس مشق میں پاکستانی فضائیہ کی شمولیت عالمی عسکری تعاون اور علاقائی استحکام کے فروغ کے عزم کی عکاسی کرتی ہے۔ یہ مشق اس بات کا بھی اظہار ہے کہ پاکستانی فضائیہ جدید جنگی تقاضوں کے مطابق اپنی صلاحیتوں کو مسلسل بہتر بناتی رہے گی اور فضائی آپریشنز کے ہر شعبے میں اپنی روایتی برتری کو برقرار رکھے گی۔