اسلام آباد:وزیرِ اعظم شہباز شریف نے ملکی برآمدات کو 60 ارب ڈالر تک بڑھانے کے لیے مؤثر حکمت عملی تیار کرنے کی ہدایت کی ہے۔
وزیرِ اعظم کی زیرِ صدارت ملکی برآمدات بڑھانے کے حوالے سے اجلاس ہوا جس میں معاشی ٹیم کو 5 سالوں میں برآمدات کا ہدف 60 ارب ڈالر تک لے جانے کے لیے جامع حکمت عملی تشکیل دینے کی ہدایت کی گئی۔ وزیراعظم نے اس بات پر زور دیا کہ معیشت اور برآمدات کے فروغ کے لیے ٹیرف کے نظام میں پائیدار اصلاحات متعارف کرائی جائیں۔
شہباز شریف نے ٹیرف میں کمی اور اس نظام کو عام فہم بنانے کی ضرورت پر زور دیتے ہوئے کہا کہ اس سے صنعتی پیداوار میں اضافہ ممکن ہو سکے گا۔ انہوں نے برآمدات کے فروغ کے لیے سروسز، آئی ٹی اور زراعت کے شعبوں کو خصوصی اہمیت دینے کی ہدایت کی، کیونکہ یہ شعبے "اڑان پاکستان" وژن کے تحت ملکی معیشت کی ترقی میں کلیدی کردار ادا کریں گے۔
وزیرِ اعظم نے برآمدی صنعتوں کی ترقی کے لیے ایکسپورٹ ڈیولپمنٹ فنڈ کے گورننس نظام میں اصلاحات کی ضرورت پر بھی زور دیا۔
اجلاس میں وزیرِ اعظم کو وزارتِ تجارت کی اصلاحات اور آئندہ پانچ سالوں میں 60 ارب ڈالر کی برآمدات کے ہدف کو حاصل کرنے کے لیے کیے جانے والے اقدامات پر بریفنگ دی گئی۔ بریفنگ میں بتایا گیا کہ گزشتہ دو سالوں میں ٹیرف میں بتدریج کمی کی گئی اور وزارتِ تجارت بین الاقوامی نمائشوں کا انعقاد کر رہی ہے۔
مزید برآں، اسٹرٹیجک ٹریڈ پالیسی فریم ورک 2025 پر مشاورت جاری ہے، اور ای کامرس پالیسی کی منظوری بھی اگلے مہینے کابینہ کے سامنے پیش کی جائے گی۔ نیشنل کمپلائنس سینٹر بھی تیار ہو چکا ہے، جس کے ذریعے پاکستان کی برآمدی صنعتوں کی استعداد بڑھائی جائے گی۔
اس اجلاس میں وفاقی وزیرِ تجارت جام کمال خان، وزیرِ اقتصادی امور احد خان چیمہ، وزیرِ خزانہ محمد اورنگزیب، چیئرمین ایف بی آر راشد محمود لنگڑیال اور متعلقہ اداروں کے اعلیٰ افسران بھی شریک ہوئے۔
