اداکارہ ہاجرہ یامین مستقبل میں بڑے کردار ادا کرنے کے لیے پرعزم

کراچی: اداکارہ ہاجرہ یامین نے کہا ہے کہ انہیں اب اس بات کا بھرپور احساس ہو چکا ہے کہ ناظرین ان کے کام اور اداکاری کو پسند کرتے ہیں، اور وہ مستقبل میں ڈراموں میں مرکزی کردار ادا کرنے کی خواہش رکھتی ہیں۔

انہوں نے بتایا کہ حال ہی میں نشر ہونے والے ڈرامے ڈاکٹر بہو میں ان کے کردار کو شاندار پذیرائی ملی۔ اگرچہ وہ مرکزی کردار میں شامل نہیں تھیں، تاہم ان کی اداکاری اور جذباتی مناظر نے ناظرین کی توجہ حاصل کی۔

ہاجرہ یامین اس وقت ڈراموں ہمراہی اور ایک محبت اور میں بھی جلوہ گر ہیں۔ ان کا کہنا ہے کہ ایک اداکار کے طور پر وہ ہر کردار میں اپنی بہترین صلاحیتیں پیش کرنے کی کوشش کرتی ہیں اور ناظرین کی محبت انہیں مزید بہتر کام کی طرف لے جاتی ہے۔

انہوں نے بتایا کہ وہ گزشتہ 8 سال سے شوبز انڈسٹری سے وابستہ ہیں اور اس دوران انہیں کامیابیوں کے ساتھ ساتھ کئی چیلنجز کا سامنا بھی رہا ہے، جنہوں نے ان کی اداکاری کو مزید نکھارا۔

اداکارہ کے مطابق وہ ہمیشہ روایتی کرداروں کے بجائے مختلف اور چیلنجنگ کرداروں کا انتخاب کرتی ہیں۔ انہوں نے کہا کہ ابتدائی طور پر انہوں نے ڈاکٹر بہو میں کردار کرنے سے انکار کیا تھا، تاہم بعد میں پروڈیوسر ندیم بیگ کے اصرار پر اس پروجیکٹ کا حصہ بنیں۔

ہاجرہ یامین نے اپنے ساتھی اداکار عدیل حسین کی بھی تعریف کی اور کہا کہ انہوں نے شوٹنگ کے دوران انہیں بھرپور آزادی دی، جس سے وہ اپنے کردار کو بہتر انداز میں پیش کر سکیں۔

ان کا کہنا تھا کہ وہ تنقیدی رائے کو اہمیت دیتی ہیں اور اب ان کی کوشش ہے کہ وہ زیادہ تجارتی کامیابی حاصل کریں اور مختلف نوعیت کے کرداروں میں نظر آئیں۔

اداکارہ نے مزید کہا کہ وہ اپنے کام پر مکمل اعتماد رکھتی ہیں اور مستقبل میں مزید بڑے اور یادگار کرداروں کے ساتھ ناظرین کے سامنے آتی رہیں گی۔