اسحاق ڈار کی یورپی ارکانِ پارلیمنٹ سے ملاقات، اہم امور پر تبادلہ خیال

برسلز : پاکستان کے نائب وزیراعظم و وزیر خارجہ اسحاق ڈار نے برسلز میں یورپی ارکانِ پارلیمنٹ سے ملاقات کی، جس میں دونوں جانب سے باہمی تعلقات، تجارتی شراکت، اور معاشی تعاون کے فروغ پر تفصیلی گفتگو ہوئی۔ یہ ملاقات پاکستان ہاؤس میں ایک عشائیے کے دوران ہوئی، جس کا مقصد پاکستان اور یورپی یونین کے درمیان تعلقات کو مزید مستحکم کرنا تھا۔

دفترِ خارجہ کے ترجمان نے بتایا کہ یہ ملاقات غیر رسمی ماحول میں ہوئی، تاہم اس میں دونوں فریقوں نے مختلف اہم امور پر کھل کر بات چیت کی۔ ملاقات میں پاکستان اور یورپی یونین کے درمیان تجارتی تعلقات، سیاسی روابط، اور معاشی تعاون کی مزید ترقی کے حوالے سے مختلف تجاویز پر غور کیا گیا۔

اس کے علاوہ، ملاقات میں خطے کی موجودہ سکیورٹی صورتحال اور عالمی سطح پر ہونے والی تبدیلیوں کے اثرات پر بھی تبادلہ خیال کیا گیا۔ یورپی پارلیمنٹ کے اراکین نے پاکستان کے مؤقف میں گہری دلچسپی ظاہر کی اور مختلف عالمی اور خطی مسائل پر پاکستان کے موقف کو سمجھنے کی کوشش کی۔

ترجمان دفترِ خارجہ کے مطابق، پاکستان اور یورپی یونین کے درمیان حالیہ مہینوں میں سفارتی روابط میں تیزی آئی ہے، اور دونوں فریقوں نے آئندہ مزید ملاقاتوں اور تعاون بڑھانے کے امکانات کا عندیہ بھی دیا ہے۔