اسلام آباد: ایلون مسک کی کمپنی سٹار لنک کو پاکستان میں سیٹلائٹ انٹرنیٹ سروسز فراہم کرنے کی اجازت مل گئی ہے، جب کہ سپیس ریگولیٹری بورڈ نے کمپنی کو این او سی جاری کر دیا ہے۔
سٹار لنک نے پاکستان سپیس ایکٹیوٹیز ریگولیٹری بورڈ کے تمام تقاضے پورے کر لیے ہیں، اور وزارت داخلہ کی کلیئرنس کے بعد این او سی جاری کیا گیا ہے۔ اس کے بعد پی ٹی اے آئندہ دو ہفتوں میں اسٹار لنک کو اپنا لائسنس جاری کر دے گا۔
ذرائع کے مطابق، سٹار لنک نے پی ٹی اے میں لائسنس کی درخواست کے ساتھ ساتھ تکنیکی اور بزنس پلان بھی جمع کروا چکا ہے، اور اس کے ساتھ ساتھ کمپنی نے پاکستان میں رجسٹریشن کے تین مراحل بھی مکمل کر لیے ہیں۔ اسٹار لنک نے ایس ای سی پی، پاکستان سافٹوئیر ایکسپورٹ بورڈ اور پاکستان اسپیس ایکٹیوٹیز ریگولیٹری بورڈ سے رجسٹریشن حاصل کر لی ہے۔ اب آخری مرحلہ پی ٹی اے سے رجسٹریشن کا ہے۔
پی ٹی اے کی جانب سے لائسنس کے اجرا کے بعد اسٹار لنک اپنی خدمات کا آغاز کر سکے گا۔ کمپنی کی سروسز پاکستانی نیٹ ورک میں کسی قسم کا خلل پیدا نہیں کریں گی۔
پاکستان نے 2023 میں نیشنل سیٹلائٹ پالیسی متعارف کرائی تھی، جس کے بعد 2024 میں اسپیس کمیونیکیشن کو مضبوط کرنے کے لیے اسپیس ایکٹیویٹیز رولز کا نفاذ کیا گیا تھا۔
