لاہور : پاکستان سپر لیگ 10 میں ملتان سلطانز کی ٹیم تین لگاتار میچز ہارنے کے بعد اب اپنے ہوم گراؤنڈ ملتان میں لاہور قلندرز کے خلاف چوتھا میچ کھیلے گی۔ یہ میچ آج رات 8 بجے ملتان کرکٹ سٹیڈیم میں شروع ہوگا۔
ملتان سلطانز کی قیادت محمد رضوان کے ہاتھوں میں ہو گی، جبکہ لاہور قلندرز کی ٹیم کی قیادت شاہین شاہ آفریدی کریں گے۔ ملتان کے کپتان محمد رضوان نے اپنے بیان میں کہا کہ اگلے دونوں میچز ہمارے فینز کے سامنے ہونگے، جو ایک اچھی بات ہے، مگر ہمیں اچھی کرکٹ کھیلنی ہو گی۔
انہوں نے فیلڈنگ پر خاص توجہ دینے کی بات کی، کیونکہ فیلڈنگ کی خراب کارکردگی کی وجہ سے ملتان نے میچز گنوائے ہیں۔ رضوان نے کہا کہ اگر فیلڈنگ پر قابو پا لیا تو پورا ٹورنامنٹ ہمارے لیے اچھا گزرے گا۔ کپتان رضوان نے اپنی فارم کے بارے میں کہا کہ جو گزر گیا وہ گزر گیا، ہر دن نیا ہوتا ہے اور وہ اپنی پرفارمنس سے مطمئن ہیں۔
