ایران جنگی مشقیں کر رہا ہے ، کارروائی پر سخت جواب دیں گے، نیتن یاہو کی دھمکی

تل ابیب : اسرائیلی وزیراعظم نیتن یاہو نے ایران کو دھمکی دیتے ہوئے کہا ہے کہ ایران جنگی مشقیں کر رہا ہے اور ان کے تمام اقدامات پر نظر رکھی جا رہی ہے۔ نیتن یاہو نے کہا کہ ایران کی کسی بھی جارحانہ کارروائی کا سخت جواب دیا جائے گا۔

نیتن یاہو نے مزید کہا کہ ایران کی جوہری سرگرمیوں کے بارے میں وہ امریکی صدر ڈونلڈ ٹرمپ سے بات کریں گے تاکہ اس مسئلے کو مزید شدت سے اٹھایا جا سکے اور عالمی سطح پر اس پر ردعمل دیا جا سکے۔

دوسری جانب، ایرانی وزارت خارجہ کے ترجمان نے کہا کہ ایران کا میزائل پروگرام صرف دفاعی مقاصد کے لیے ہے اور اس پر کسی بھی قسم کا سمجھوتہ نہیں کیا جائے گا۔ ان کا کہنا تھا کہ ایران کی مسلح افواج ہمیشہ اپنے ملک کی حفاظت کے لیے تیار ہیں اور کسی بھی بیرونی خطرے کا بھرپور مقابلہ کرنے کے لیے ہر وقت مستعد ہیں۔