بیجنگ: پاکستانی سفارت خانے میں یومِ پاکستان کی پروقار تقریب، وطن سے محبت کے گہرے رنگ

بیجنگ : چین کے دارالحکومت بیجنگ میں قائم پاکستانی سفارت خانے میں یومِ پاکستان روایتی جوش و جذبے اور پروقار انداز میں منایا گیا۔ تقریب میں سفارت خانے کے اعلیٰ حکام، بیجنگ میں مقیم پاکستانی کمیونٹی اور ان کے اہلِ خانہ نے بڑی تعداد میں شرکت کر کے ارضِ پاک سے اپنی گہری وابستگی کا اظہار کیا۔
تقریب کا آغاز تلاوتِ کلام پاک سے ہوا، جس کے بعد قومی ترانے کی گونج میں سبز ہلالی پرچم فضا میں لہرایا گیا۔ اس موقع پر     صدرِ مملکت اور وزیراعظم پاکستان کے خصوصی پیغامات پڑھ کر سنائے گئے، جن میں 23 مارچ 1940 کی تاریخی اہمیت اور قوم کی یکجہتی پر زور دیا گیا تھا۔    پیغامات میں چین میں مقیم پاکستانیوں کی محنت اور دونوں ممالک کے درمیان ہمہ موسمی دوستی کو بھی سراہا گیا۔
سفارت خانے میں منعقدہ اس تقریب میں پاکستانی خاندانوں اور بچوں نے بھرپور شرکت کی۔    ننھے بچوں نے قومی لباس زیب تن کر رکھے تھے اور ملی نغموں پر اپنے جذبات کا اظہار کیا۔    شرکاء نے وطنِ عزیز کی سلامتی، معاشی استحکام اور خوشحالی کے لیے خصوصی دعائیں مانگیں۔
چین میں یومِ پاکستان کی یہ تقریب نہ صرف ہماری آزادی کا جشن ہے بلکہ یہ پاک چین دوستی کے اس مضبوط رشتے کی بھی عکاسی کرتی ہے جو وقت کے ساتھ مزید توانا ہو رہا ہے۔