وزیراعظم شہباز شریف کا صدر ٹرمپ کی امن کوششوں کا خیرمقدم، مذاکرات کے اگلے دور کی میزبانی پاکستان کرنے کی امید

اسلام آباد: وزیراعظم شہباز شریف نے امریکا اور ایران کے درمیان تاریخی امن معاہدے کی پیشرفت پر امریکی صدر ڈونلڈ ٹرمپ کی سفارتی کوششوں کو زبردست الفاظ میں سراہتے ہوئے امید ظاہر کی ہے کہ اس اہم امن عمل کے مذاکرات کا اگلا دور جلد پاکستان کی میزبانی میں ہوگا۔

وزیراعظم شہباز شریف نے اپنے ایک خصوصی بیان میں بتایا کہ امریکی صدر ڈونلڈ ٹرمپ کے ساتھ ہونے والی بین الاقوامی کانفرنس کال انتہائی مفید اور تعمیری رہی۔ انہوں نے اس بات کی بھی تصدیق کی کہ اس اعلیٰ سطح کی اہم ترین کانفرنس کال میں پاکستان کی نمائندگی فیلڈ مارشل عاصم منیر نے کی۔

     وزیراعظم کا کہنا تھا کہ پاکستان خطے میں پائیدار امن اور استحکام کا ہمیشہ سے خواہاں رہا ہے، اور تہران و واشنگٹن کے درمیان جاری ڈیڈ لاک کو ختم کرنے کے لیے ہماری کوششیں رنگ لا رہی ہیں۔ انہوں نے یقین دلایا کہ پاکستان مستقبل میں بھی اس امن ڈیل کو منطقی انجام تک پہنچانے کے لیے اپنا کلیدی کردار ادا کرتا رہے گا۔

سفارتی حلقوں کے مطابق، امریکی صدر کی اہم ترین کال میں فیلڈ مارشل عاصم منیر کی شمولیت اور وزیراعظم کی جانب سے پاکستان میں اگلے دورِ مذاکرات کی میزبانی کی پیشکش یہ ثابت کرتی ہے کہ اس عالمی امن معاہدے کے پیچھے پاکستان کا اسٹریٹجک اور سفارتی وزن سب سے اہم رہا ہے۔