پاکستان کے تنویر بٹ تیسری بار مسٹر اولمپیا بن گئے

تن سازی میں پاکستان کے لیے معذور تن سازوں کی کیٹگری میں تیسری بار مسٹر اولمپیا کا ٹائٹل جیتنے والے تنویر بٹ نے کہا ہے کہ اگر حکومت ان کی سرپرستی کرے تو وہ ملک کا نام مزید روشن کرسکتے ہیں۔

امریکہ سے وطن واپسی پر لاہور ایئرپورٹ پر تنویر بٹ کا شاندار استقبال کیا گیا۔ اس موقع پر انہوں نے کہا کہ اپنی کیٹگری میں ان کا یہ تیسرا گولڈ میڈل ہے۔ انہوں نے کہا کہ میری خواہش ہے کہ وہ سات بار مسٹر اولمپیا کا ٹائٹل جیت کر معروف تن ساز آرنلڈ کا ریکارڈ برابر کریں۔ تنویر بٹ کے مطابق وسائل نہ ہونے کے باوجود انہوں نے ہمت نہیں ہاری اور 35 ممالک کے تن سازوں کے مقابلے میں تیسری بار گولڈ میڈل جیت کر ملک کا نام روشن کیا ہے۔