فضائی آلودگی کی سطح میں خطرناک حد تک اضافہ ، لاہوردنیا کے آلودہ ترین شہروں میں پہلے نمبر پر

لاہور: عالمی فضائی آلودگی کے ادارے آئی کیو ایئر کے مطابق، لاہور ایک مرتبہ پھر دنیا کے آلودہ ترین شہروں کی فہرست میں پہلے نمبر پر آ گیا ہے، جبکہ ملک کا سب سے بڑا شہر کراچی چوتھے نمبر پر ہے۔ اس وقت لاہور میں ایئر کوالٹی انڈیکس 312 ریکارڈ کی گئی، جب کہ لاہور کے مختلف علاقوں میں فضائی آلودگی کی سطح خطرناک حد تک پہنچ چکی ہے۔

ماہرین ماحولیات کے مطابق، لاہور میں سموگ کی اوسط شرح 362 تک پہنچ چکی ہے، جبکہ علامہ اقبال ٹاؤن کا ایئر کوالٹی انڈیکس 589 تک جا پہنچا ہے۔ پنجاب کے مختلف شہروں جیسے چک جھمرہ، فیصل آباد، رائیونڈ اور ملتان میں بھی فضائی آلودگی کی سطح تشویشناک حد تک بڑھ چکی ہے۔ چک جھمرہ میں ایئر کوالٹی 664 ریکارڈ کی گئی جو کہ نہایت نقصان دہ ہے۔

حکومت پنجاب نے سموگ کی روک تھام کے لیے مختلف اقدامات شروع کر دیے ہیں، جن میں اینٹی اسموگ گن کا استعمال، پلاستک بیگ پر پابندی اور زگ زیگ ٹیکنالوجی کا نفاذ شامل ہے۔ وزیر اطلاعات مریم اورنگزیب نے لاہور میں ایک خطاب کے دوران کہا کہ "فضائی آلودگی کے اس بحران سے نمٹنے کے لیے ہمیں تمام طبقات کا تعاون درکار ہے۔"

انہوں نے مزید کہا کہ پنجاب بھر میں سموگ کی وجہ سے سانس کی بیماریوں میں اضافہ ہو چکا ہے اور شہریوں کو گھروں سے غیر ضروری طور پر باہر نہ نکلنے کی ہدایت کی گئی ہے۔

عالمی اداروں کے مطابق اس سطح کی آلودگی انسانی صحت کے لیے خطرناک ہے، خاص طور پر بچوں، بزرگوں اور سانس کی بیماریوں کے مریضوں کے لیے۔ اس صورتحال میں فوری طور پر مزید اقدامات کی ضرورت ہے تاکہ اس بحران سے نمٹا جا سکے۔