کسی بھی اقلیتی رکن کے ساتھ زیادتی ہوئی تو سیسہ پلائی دیوار کی طرح کھڑی ہوں گی،مریم نواز

لاہور: وزیراعلیٰ پنجاب مریم نواز شریف نے کرسمس کی تقریب کے دوران اقلیتی حقوق کے تحفظ کا عہد کرتے ہوئے کہا کہ "جب تک میں وزیراعلیٰ ہوں، پنجاب میں اگر کسی بھی اقلیتی رکن کے ساتھ زیادتی ہوئی تو میں سیسہ پلائی دیوار کی طرح اس کے خلاف کھڑی ہوں گی۔"

انہوں نے اس عزم کا اظہار کیا کہ اقلیتوں کے حقوق پر کوئی سمجھوتا نہیں کیا جائے گا اور اگر صوبے میں اقلیتوں کے لیے قبرستانوں یا دیگر مسائل درپیش ہیں، تو انہیں فوراً حل کیا جائے گا۔ مریم نواز نے اقلیتی رہنما رمیش سنگھ اروڑا کو ہدایت کی کہ وہ اقلیتی برادری کے لیے درکار بجٹ کی تفصیلات فراہم کریں تاکہ حکومت ان مسائل کو حل کر سکے۔

وزیراعلیٰ نے مزید کہا کہ "ہم سب مسلمان، سکھ، مسیحی یا ہندو نہیں بلکہ پاکستانی ہیں" اور پنجاب کو اقلیتوں کے لیے ایک بہتر جگہ بنانے کا عزم ظاہر کیا۔ انہوں نے کہا کہ کسی کو بھی اقلیتوں کے حقوق سے کھیلنے کی اجازت نہیں دی جائے گی۔

مریم نواز نے "ستھرا پنجاب" کے ورکرز کی جانب سے چرچز کی صفائی کے اقدامات کی تعریف کی اور کہا کہ اس سلسلے کو جاری رکھا جائے گا تاکہ صوبہ ہر شہری کے لیے محفوظ اور خوشگوار بن سکے۔ ان کا کہنا تھا کہ "پنجاب میں تمام مذاہب کی عبادت گاہوں کو صاف اور بہتر بنایا جا رہا ہے۔"

وزیراعلیٰ پنجاب نے کہا کہ "پنجاب کے بجٹ میں اقلیتوں کا بھی اتنا ہی حق ہے جتنا دوسروں کا ہے، اور جو حکومت اقلیتوں کے تحفظ میں ناکام ہو، اسے اپنا کام سمیٹ کر گھر جانا چاہیے۔" مزید برآں، انہوں نے حکومت کے ارادے کا ذکر کیا کہ وہ مینارٹی کارڈ کی رقم کو 75 ہزار سے بڑھا کر ایک لاکھ روپے تک لے جانے کا منصوبہ رکھتی ہیں تاکہ اقلیتوں کی فلاح و بہبود کو مزید بہتر بنایا جا سکے۔

آخر میں مریم نواز نے کہا کہ "ہمیں پوری دنیا کے سامنے پنجاب کو ایک مثال بنانا ہے اور دکھانا ہے کہ صوبے کے تمام شہری سیسہ پلائی دیوار کی طرح متحد اور محفوظ ہیں۔ پنجاب نے واقعی اقلیتوں کو اپنا تاج اور دل کا حصہ بنایا ہے۔"