سلووینیا کی فلسطین کی حمایت میں اسرائیلی وزیرِاعظم نیتن یاہو پر پابندی

سلووینیا : سلووینیا نے اسرائیلی وزیرِاعظم بنیامین نیتن یاہو پر سفری پابندی عائد کرنے کا اعلان کیا ہے۔ یہ فیصلہ سلووینیا کی جانب سے گزشتہ سال فلسطین کو باضابطہ طور پر تسلیم کرنے کے بعد کیا گیا ہے، اور رواں سال جولائی میں اسرائیلی کابینہ کے دو دائیں بازو کے وزرا پر بھی پابندیاں عائد کی گئی تھیں۔

سلووینیا کی وزارتِ خارجہ کی اسٹیٹ سیکرٹری نیوا گراشچ کے مطابق، "اس اقدام کا مقصد بین الاقوامی قانون اور انسانی حقوق کی اقدار کے عزم کا اظہار کرنا ہے، اور سلووینیا کی اصولی اور مستقل خارجہ پالیسی کی تائید کرنا ہے۔"

سلووینیا نے اگست میں اسرائیل کو اسلحے کی فروخت پر پابندی لگائی تھی اور اسرائیلی زیرِ قبضہ فلسطینی علاقوں میں تیار کی جانے والی اشیاء کی درآمد بھی ممنوع قرار دی تھی۔ نیوا گراشچ نے مزید کہا کہ نیتن یاہو پر غزہ میں جنگی جرائم کے الزامات عالمی عدالتِ انصاف میں زیرِ سماعت ہیں، اور سلووینیا اس فیصلے کے ذریعے اسرائیل کو ایک واضح پیغام دینا چاہتا ہے کہ وہ بین الاقوامی عدالتوں کے فیصلوں اور انسانی قوانین پر مکمل عملدرآمد کی توقع رکھتا ہے۔

اس اقدام سے سلووینیا کی اسرائیل کے ساتھ تعلقات میں مزید کشیدگی کا امکان ہے، اور یہ بین الاقوامی سطح پر انسانی حقوق اور جنگی جرائم کے حوالے سے ایک مضبوط پیغام ہے۔