پاکستان کی پہلی بلٹ ٹرین: وزیراعلیٰ پنجاب نے باضابطہ منظوری دے دی

لاہور:وزیراعلیٰ پنجاب مریم نواز نے پاکستان کی پہلی بلٹ ٹرین منصوبے کی باضابطہ منظوری دے دی ہے۔ یہ تاریخی منصوبہ لاہور اور راولپنڈی کے درمیان تیز ترین سفر کی سہولت فراہم کرے گا اور ملک میں جدید سفری نظام کے ایک نئے دور کا آغاز ثابت ہوگا۔

تفصیلات کے مطابق، مسلم لیگ (ن) کے آفیشل ’ایکس‘ (سابقہ ٹوئٹر) اکاؤنٹ پر خوشخبری شیئر کی گئی، جس میں کہا گیا: "ایک اور وعدہ پورا! وزیراعلیٰ پنجاب مریم نواز پاکستان کی پہلی بلٹ ٹرین لے آئیں، جو لاہور اور راولپنڈی کو تیزی سے جوڑ دے گی۔"

منصوبے کا بنیادی مقصد شہریوں کو تیز رفتار، آرام دہ اور محفوظ سفری سہولیات فراہم کرنا ہے۔ ماہرین کا کہنا ہے کہ بلٹ ٹرین کی بدولت دونوں شہروں کے درمیان سفر کا دورانیہ نمایاں طور پر کم ہو جائے گا، جس سے وقت کی بچت کے ساتھ ساتھ کاروباری اور معاشی سرگرمیوں میں بھی اضافہ ہوگا۔

وزیراعلیٰ مریم نواز نے افتتاحی تقریب میں خطاب کرتے ہوئے کہا کہ یہ منصوبہ عوام کے روشن مستقبل کی جانب ایک اہم پیش رفت ہے۔ انہوں نے اس عزم کا اعادہ کیا کہ حکومت پنجاب شہریوں کو جدید سہولیات فراہم کرنے اور صوبے کو ترقی کی راہ پر گامزن کرنے کے لیے مزید ایسے منصوبے شروع کرے گی۔

شہریوں اور کاروباری حلقوں کی جانب سے اس انقلابی منصوبے کا خیرمقدم کیا جا رہا ہے، اور اسے پاکستان میں جدید انفراسٹرکچر کی تعمیر کی جانب ایک تاریخی قدم قرار دیا جا رہا ہے۔