"زیادہ سے زیادہ دباؤ" مہم ، امریکہ نے ایران پر نئی پابندیاں عائد کر دیں

واشنگٹن : امریکا نے ایران کے خلاف نئی پابندیاں عائد کر دی ہیں، جن کا مقصد ایران کے بیلسٹک میزائل پروگرام کو فنڈز فراہم کرنے والے جہازوں، کمپنیوں اور افراد کو نشانہ بنانا ہے۔ ان پابندیوں کے تحت 12 جہازوں، متعدد کمپنیوں اور افراد کے امریکا میں موجود اثاثے منجمد کر دیے جائیں گے، اور امریکی شہریوں کو ان کے ساتھ مالی لین دین سے روک دیا جائے گا۔

یہ پابندیاں امریکی صدر ڈونلڈ ٹرمپ کی "زیادہ سے زیادہ دباؤ" مہم کے تحت لگائی گئی ہیں۔ امریکی وزارت خزانہ کے سیکرٹری اسکاٹ بیسنٹ نے کہا کہ ایران غیر قانونی تیل کی فروخت کے ذریعے عالمی مالیاتی نظام کا غلط استعمال کر رہا ہے، جس سے اسلحہ خریدے جاتے ہیں اور دہشت گرد گروہوں کی مدد کی جاتی ہے۔

اس کے علاوہ، امریکا نے مشرق وسطیٰ میں اپنے فوجی وسائل بھی بڑھا دیے ہیں، جن میں دو ایئرکرافٹ کیریئرز اور بڑی لڑاکا ہوائی جہاز کی فلیٹس شامل ہیں، تاکہ ایران کے خلاف ممکنہ فوجی کارروائی کے لیے تیاری کی جا سکے۔