پاکستان اور آئی ایم ایف مذاکرات کا دوسرا روز: یو اے ای سے 2 ارب ڈالر قرض کی رول اوور یقین دہانی

کراچی : پاکستان اور آئی ایم ایف مشن کے درمیان تیسرے ششماہی اقتصادی جائزے کے لیے مذاکرات کا دوسرا مرحلہ آج کراچی میں جاری ہے۔ آئی ایم ایف کی ٹیم اسٹیٹ بینک آف پاکستان کے حکام کے ساتھ تکنیکی ڈیٹا پر تفصیلی تبادلہ خیال کر رہی ہے۔سٹیٹ بینک حکام نے آئی ایم ایف وفد کو ملکی معیشت کے حوالے سے اہم تکنیکی ڈیٹا فراہم کر دیا ہے، جس میں بیرونی ادائیگیوں، زرمبادلہ کے ذخائر اور مانیٹری پالیسی کے اہداف شامل ہیں۔
 آئی ایم ایف کے مطالبے پر پاکستان نے متحدہ عرب امارات (UAE) سے 2 ارب ڈالر کے ڈپازٹس کو ایک سال کے لیے رول اوور کرانے کی یقین دہانی کرا دی ہے۔ یہ اقدام بیرونی مالیاتی ضروریات کو پورا کرنے کے لیے ناگزیر قرار دیا جا رہا ہے۔ آئی ایم ایف کی ٹیم آج دوسرے روز بھی اسٹیٹ بینک حکام کے ساتھ معاشی اہداف پر بات چیت جاری رکھے گی تاکہ اقتصادی جائزے کو حتمی شکل دی جا سکے۔
 یو اے ای سے قرض کے رول اوور کی یقین دہانی سے پاکستان کے زرمبادلہ کے ذخائر پر دباؤ کم ہونے کا امکان ہے، جو کہ آئی ایم ایف کے ساتھ معاہدے کی تکمیل کے لیے ایک مثبت سفارتی و معاشی پیش رفت ہے۔