فلپائن میں کشتی حادثہ : 15 افراد ہلاک، 28 لاپتہ

مٹیلا : فلپائن کے جنوبی صوبے باسیلان کے قریب ایک کشتی کے الٹنے کے نتیجے میں کم از کم 15 افراد ہلاک ہو گئے جبکہ 28 افراد تاحال لاپتہ ہیں۔ مقامی حکام کے مطابق یہ حادثہ اس وقت پیش آیا جب مسافر بردار جہاز "ایم وی ٹرشا کرسٹن 3" زامبوانگا بندرگاہ سے روانہ ہو کر جنوبی سولو کے جزیرے جولو جا رہا تھا۔

فلپائنی کوسٹ گارڈ کے مطابق، جہاز میں 332 مسافر اور 27 عملے کے افراد سوار تھے۔ رات 1:50 بجے کشتی نے مدد کے لیے پیغام بھیجا، جو زامبوانگا سے روانگی کے تقریباً چار گھنٹے بعد تھا۔ کشتی باسیلان صوبے کے ایک جزیرہ نما گاؤں بالک-بالک کے قریب تقریباً 2 کلومیٹر دور ڈوب گئی، جہاں سے کئی زندہ بچ جانے والوں کو ابتدائی طور پر منتقل کیا گیا۔

کوسٹ گارڈ کمانڈر رومیل دوا نے بتایا کہ اب تک 316 افراد کو بچا لیا گیا ہے، جبکہ 15 افراد کی ہلاکت کی تصدیق ہو چکی ہے اور 28 افراد ابھی تک لاپتہ ہیں۔ امدادی کارروائیوں کے لیے نیوی اور ایئر فورس نے بھی اپنے وسائل فراہم کیے ہیں۔ بچائے گئے افراد کو طبی امداد کے لیے اسابیلا کے ہسپتال منتقل کیا گیا ہے۔

طبی عملے کی رکن رونالین پیریز نے کہا کہ ایک اہم چیلنج بڑی تعداد میں متاثرین کی دیکھ بھال ہے، کیونکہ اس وقت عملہ کم ہے۔ گورنر باسیلان، مجیو ہاتامان نے فیس بک پر اسابیلا بندرگاہ کے مناظر شیئر کیے، جن میں زندہ بچ جانے والوں کو کشتیوں سے اتار کر طبی امداد فراہم کی جا رہی تھی۔

تحقیقات کے مطابق فیری کی ڈوبنے کی وجہ ابھی تک معلوم نہیں ہو سکی، اور اس حوالے سے تحقیقات جاری ہیں۔ کوسٹ گارڈ نے جہاز کو روانگی سے قبل کلیئر کیا تھا اور زیادہ بوجھ ہونے کا کوئی اندیشہ نہیں تھا۔

فلپائن میں سمندری حادثات عام ہیں، جن کی وجہ شدید موسمی حالات، ناقص جہازوں کی دیکھ بھال، زیادہ مسافر سوار کرنا اور حفاظتی قوانین کی کمی ہو سکتی ہے۔ ایک مشہور حادثہ 1987 میں ہوا تھا، جب "ڈونا پاز" فیری تیل بردار جہاز سے ٹکرا کر ڈوب گیا تھا، جس میں 4,300 سے زائد افراد ہلاک ہوئے، جو دنیا کا بدترین پُرامن سمندری حادثہ تھا۔