برفیلے طوفان اور سکیورٹی چیلنجز؛ بلوچستان میں پاک فوج کا ریلوے ٹریکس پر 'آہنی پہرہ' جاری

کوئٹہ : بلوچستان میں قدرت کے قہر اور دشمن کے عزائم کے سامنے پاک فوج کے جوان سیسہ پلائی ہوئی دیوار بن گئے۔ شدید برفباری اور خون جما دینے والی سردی کے باوجود پاک فوج کے دستے ریلوے لائنوں اور مسافروں کی حفاظت کے لیے کوہِ مہران کے دشوار گزار راستوں پر ڈیوٹی انجام دے رہے ہیں۔
بلوچستان میں حالیہ برفباری نے جہاں مناظر کو سفید چادر میں ڈھک دیا ہے، وہیں نظامِ زندگی کے لیے بڑے چیلنجز بھی پیدا کر دیے ہیں۔ ان کٹھن حالات میں پاک فوج کے جوانوں نے ثابت کر دیا ہے کہ ان کے لیے فرض کی پکار ہر موسم سے بالاتر ہے۔    جعفر اور بولان ایکسپریس کی حفاظت: صوبے کی اہم ترین ٹرینوں، جعفر ایکسپریس اور بولان ایکسپریس کے مسافروں کو محفوظ سفر فراہم کرنے کے لیے ٹریکس کی چوبیس گھنٹے نگرانی کی جا رہی ہے۔جوان نہ صرف موسم سے لڑ رہے ہیں بلکہ دہشت گردی کے ممکنہ خطرات کو ناکام بنانے کے لیے بھی ہائی الرٹ ہیں۔
عسکری حکام کا کہنا ہے کہ ریلوے ٹریکس کی سکیورٹی پر کسی قسم کا سمجھوتہ نہیں کیا جائے گا۔ اپنی جان کی پرواہ کیے بغیر برفباری میں کھڑے یہ جوان اس بات کی علامت ہیں کہ قوم کے جان و مال کا تحفظ ہر حال میں یقینی بنایا جائے گا۔محکمہ موسمیات کی جانب سے 27 جنوری تک مزید شدید بارشوں اور برفباری کی پیشگوئی کے پیشِ نظر سیکیورٹی کے انتظامات کو مزید سخت کر دیا گیا ہے تاکہ کسی بھی ناخوشگوار واقعے سے بچا جا سکے۔