ایپ انسٹا گرام کے ماہانہ صارفین کی تعداد 3 ارب سے تجاوز کر گئی

کیلیفورنیا : انسٹاگرام نے میٹا کی تیسری ایسی ایپ بن کر تاریخ رقم کر دی ہے جس کے ماہانہ فعال صارفین کی تعداد 3 ارب سے تجاوز کر گئی ہے۔ اس سے قبل فیس بک اور واٹس ایپ نے یہ سنگ میل حاصل کیا تھا۔

میٹا کے سی ای او مارک زکربرگ نے اپنے انسٹاگرام چینل پر یہ خوشخبری دیتے ہوئے کہا کہ ہم ایک حیرت انگیز کمیونٹی بنا رہے ہیں جس کا حجم اب 3 ارب سے زیادہ ہے۔ انسٹاگرام کو 2012 میں میٹا نے تقریباً ایک ارب ڈالرز میں خریدا تھا، اور اب یہ ایپ اتنی مقبول ہو گئی ہے کہ صرف 3 سال میں صارفین کی تعداد 2 ارب سے بڑھ کر 3 ارب ہو گئی ہے۔

میٹا نے اپریل 2024 میں اعلان کیا تھا کہ وہ اب صارفین کی تعداد کے مکمل اعداد و شمار نہیں دیں گے، لیکن اہم سنگ میلوں کی معلومات ضرور شیئر کی جاتی ہیں۔

مارک زکربرگ نے جنوری 2025 میں بتایا تھا کہ فیس بک کے روزانہ استعمال کرنے والے صارفین کی تعداد 3 ارب سے تجاوز کر گئی ہے، جبکہ اپریل میں انہوں نے یہ بھی اعلان کیا تھا کہ واٹس ایپ کے 3 ارب سے زائد ماہانہ صارفین ہیں۔

یہ کامیابیاں میٹا کی ایپس کی عالمی مقبولیت اور ڈیجیٹل کمیونیکیشن میں اس کے اثر و رسوخ کو ظاہر کرتی ہیں۔