گوگل میپس میں نانو بنانا امیج جنریٹر کا اضافہ متوقع

کیلیفورنیا : حالیہ مہینوں میں گوگل کا نانو بنانا امیج جنریٹر بہت زیادہ مقبول ہوا ہے اور اس نے جیمنائی اے آئی ماڈل کو استعمال کرنے والے افراد کی تعداد میں بھی اضافہ کیا ہے۔ اب گوگل اس مقبول ایپ کو اپنی معروف نیویگیشن ایپ، گوگل میپس میں شامل کرنے پر کام کر رہا ہے۔

اگرچہ یہ سننے میں عجیب لگتا ہے کہ ایک نیویگیشن ایپ میں اے آئی امیج جنریٹر کا اضافہ کیا جائے، لیکن اینڈرائیڈ اتھارٹی کی رپورٹ کے مطابق، گوگل میپس کے تازہ ترین ورژن کے کوڈ سے یہ عندیہ ملتا ہے کہ نانو بنانا کو میپس کا حصہ بنایا جا رہا ہے۔

رپورٹ میں بتایا گیا کہ نانو بنانا کو گوگل میپس میں اسٹریٹ ویو کے مقامات کی تصاویر تخلیق کرنے کے لیے استعمال کیا جا سکے گا۔ اس کا مطلب یہ ہے کہ آپ گوگل میپس میں مختلف مقامات کو نئے انداز میں دیکھ سکیں گے، اور ان تصاویر کا منظر نامہ آپ کی تحریری ہدایات پر انحصار کرے گا۔

یہ فیچر گوگل میپس کی تجرباتی اور جدید خصوصیتوں میں مزید جدت کا اضافہ کرے گا اور صارفین کو مقامات کے بارے میں نیا اور دلچسپ تجربہ فراہم کرے گا۔