لاہور: نگران وزیر اعلیٰ پنجاب محسن رضا نقوی کی زیر صدارت امن و امان کے حوالے سے اہم اجلاس ہوا جس میں محرم الحرام خصوصاً یوم عاشور کے دوران عوام کے جان و مال کے تحفظ کیلئے سکیورٹی پلان کا تفصیلی جائزہ لیا گیا۔
وزیر اعلیٰ محسن رضا نقوی نے تمام کمشنرز اور آرپی اوز کو بارشوں کے پیش نظر جلوسوں اور مجالس کیلئے پیشگی پلان تیار کرنے کا حکم دیتے ہوئے کہا کہ عوام کے جان و مال کے تحفظ کیلئے وضع کردہ سکیورٹی پلان پر ہر صورت عملدرآمد یقینی بنایا جائے اور ضابطہ اخلاق کی پابندی کرائی جائے۔
آئی جی پنجاب نے محرم الحرام کے دوران سکیورٹی انتظامات کے بارے میں تفصیلی بریفنگ دی جبکہ عسکری و سول حکام نے رپورٹس بھی پیش کیں، اجلاس میں فیصلہ کیا گیا کہ 8،9 اور 10 محرم الحرام کو جلوسوں اور مجالس کی ڈرون کوریج پر مکمل پابندی ہو گی، فوج، رینجرز اور پولیس کے چاک و چوبند دستے فلیگ مارچ کریں گے۔
مساجد، امام بارگاہوں اور دیگر عبادت گاہوں کی سکیورٹی پر بھرپور توجہ مرکوز کی جائے، امن کمیٹیوں کے ارکین اور منتخب نمائندے مذہبی ہم آہنگی کے فروغ کیلئے بھرپور کردار ادا کریں، غیر ملکیوں کی حفاظت کیلئے ایس او پیز پر عملدرآمد یقینی بنایا جائے۔
