"پاکستان کا جدید ٹیکنالوجی کی جانب بڑا قدم، ایشیا پیسفک میں وائی فائی 7 اپنانے والے اولین ممالک میں شامل"

اسلام آباد : پاکستان نے تیز رفتار اور قابلِ اعتماد انٹرنیٹ کنیکٹیویٹی کی جانب اہم پیش رفت کرتے ہوئے وائی فائی 7 ٹیکنالوجی اپنانے والے ایشیا پیسفک کے ابتدائی ممالک کی فہرست میں جگہ بنا لی ہے۔

پاکستان ٹیلی کمیونیکیشن اتھارٹی (PTA) نے وائی فائی 7 کے لیے 6 گیگا ہرٹز بینڈ کے استعمال کی باضابطہ منظوری دے دی ہے، جو جدید وائرلیس کمیونیکیشن کی دنیا میں ایک بڑا قدم تصور کیا جا رہا ہے۔

یہ نئی بینڈ ٹیکنالوجی نہ صرف زیادہ اسپیڈ اور کم لیٹنسی فراہم کرے گی، بلکہ اسمارٹ سٹیز، تعلیمی اداروں، صنعتوں، اور کاروباری اداروں کے لیے بھی انقلابی فوائد کی حامل ہوگی۔

پی ٹی اے کے مطابق، 6 گیگا ہرٹز بینڈ کے کھلنے سے نہ صرف گھریلو اور کمرشل نیٹ ورکنگ میں بہتری آئے گی، بلکہ پاکستان عالمی ڈیجیٹل ماحولیاتی نظام میں مزید مربوط ہو جائے گا۔

ماہرین کا کہنا ہے کہ وائی فائی 7 کا نفاذ پاکستان کے ڈیجیٹل پاکستان وژن اور ٹیکنالوجی پر مبنی معیشت کی طرف ایک واضح قدم ہے، جو نہ صرف شہریوں کی زندگی آسان بنائے گا بلکہ عالمی سرمایہ کاری کو بھی فروغ دے گا۔