سیاسی استحکام اور معاشی بحران پر توجہ ضروری، انتہا پسندی قبول نہیں:بلاول بھٹو زرداری

لاڑکانہ:چیئرمین پیپلزپارٹی بلاول بھٹو زرداری نے میڈیا سے گفتگو کرتے ہوئے کہا ہے کہ پاکستان کو کسی ایک سیاسی جماعت کی لمبی حکمرانی سے نہیں بلکہ سیاسی استحکام سے مضبوط بنایا جا سکتا ہے۔ انہوں نے واضح کیا کہ پی ٹی آئی کو انتہا پسندی کی سیاست چھوڑ دینی چاہیے اور اگر کوئی سیاسی جماعت انتہا پسند تنظیم کے طور پر کام کرے گی تو ریاست کا ردعمل لازمی ہوگا۔

بلاول بھٹو کے مطابق انتہاپسندی کی سیاست پر سختی کی جائے گی، اس لیے اس پر شکوہ نہیں کیا جا سکتا۔ انہوں نے مزید کہا کہ پی ٹی آئی کے ساتھ تو کچھ بھی نہیں ہوا اور سیاسی تقسیم کم ہونی چاہیے۔ تمام سیاسی جماعتوں کو چاہیے کہ وہ بات چیت کے ذریعے سیاسی مسائل کے حل تلاش کریں۔

صدر آصف علی زرداری کو موجودہ حالات میں اپنا کردار ادا کرنا ہوگا تاکہ ملک میں سیاسی ہم آہنگی اور استحکام قائم ہو سکے۔ انہوں نے عوام کو یقین دہانی کرائی کہ کونسی جماعت کتنی مدت حکومت کرے گی، یہ فیصلہ صرف عوام کریں گے۔

چیئرمین پیپلزپارٹی نے واضح کیا کہ فی الحال وہ قبل از وقت انتخابات کا مطالبہ نہیں کر رہے لیکن آئندہ انتخابات آئیں گے۔ انہوں نے کہا کہ وفاقی حکومت اگر معاشی بحران حل کرنا چاہتی ہے تو اسے پبلک پرائیویٹ پارٹنرشپ (PPP) ماڈل اپنانا ہوگا تاکہ ترقیاتی منصوبے اور معیشت مضبوط ہو سکیں۔

بلاول بھٹو زرداری کی یہ گفتگو لاڑکانہ میں میڈیا سے ہوئی اور انہوں نے ملکی سیاسی صورتحال اور اقتصادی مسائل پر اپنی پارٹی کے موقف کا تفصیلی اظہار کیا۔