اب بغیر کوڈنگ کے ویب ایپس بنائیں ،گوگل کا نیا AI سے چلنے والا ‘اوپل’ ٹول متعارف

واشنگٹن : عالمی ٹیکنالوجی کمپنی گوگل نے ایک نیا جدید AI ٹول ‘اوپل’ متعارف کرایا ہے جو صارفین کو بغیر کوڈنگ کے صرف عام زبان میں ہدایات دے کر ویب ایپلیکیشنز بنانے کی سہولت فراہم کرتا ہے۔ یہ ٹول اس وقت امریکا میں ’گوگل لیبز‘ کے تحت تجرباتی مرحلے میں دستیاب ہے۔

اوپل ٹول کا مقصد ایسے افراد کو ویب ایپ بنانے کے قابل بنانا ہے جو روایتی کوڈنگ نہیں جانتے مگر اپنی تخلیقی صلاحیتوں کے ذریعے خودمختار طریقے سے ایپس تیار کرنا چاہتے ہیں۔ صارفین دو طریقوں سے ایپ بنا سکتے ہیں، یا تو مکمل خالی صفحے سے شروع کریں یا پہلے سے موجود ایپس کی گیلری سے منتخب کر کے اپنی ضروریات کے مطابق تبدیلی کریں۔

گوگل کے اندرونی AI ماڈلز صارف کی دی گئی ہدایات کی بنیاد پر ایپ کی ساخت تیار کرتے ہیں اور ہر مرحلے کو بصری ورک فلو کی صورت میں دکھاتے ہیں، جہاں ان پٹ، آؤٹ پٹ اور پراسیسنگ کے تمام مراحل واضح ہوتے ہیں۔ صارف ان مراحل میں ترمیم کر سکتا ہے اور نئے مراحل شامل کر سکتا ہے۔

اوپل کی مدد سے تیار شدہ ایپس آن لائن شائع کی جا سکتی ہیں اور ایک لنک کے ذریعے دوسروں کے ساتھ آسانی سے شیئر کی جا سکتی ہیں۔ یہ ٹول گوگل کی اس نئی حکمت عملی کا حصہ ہے جس کا مقصد عام صارفین اور تخلیقی ذہن رکھنے والے افراد کو ایپ ڈویلپمنٹ میں خودمختار بنانا ہے۔