پاکستان کے ایٹمی طاقت بننے کے 27 سال مکمل ، قوم آج یومِ تکبیر ملی جوش و جذبے سے منا رہی ہے

اسلام آباد: پاکستان کے ایٹمی طاقت بننے کے 27 سال مکمل ہونے پر آج ملک بھر میں یومِ تکبیر قومی جوش و جذبے سے منایا جا رہا ہے۔ 28 مئی 1998 کو پاکستان نے بلوچستان کے ضلع چاغی میں کامیاب ایٹمی دھماکے کر کے خود کو دنیا کی ساتویں اور اسلامی دنیا کی پہلی ایٹمی طاقت کے طور پر منوایا تھا۔

یومِ تکبیر پاکستان کی تاریخ کا وہ یادگار دن ہے جب قوم نے یکجہتی کا مظاہرہ کرتے ہوئے دشمن کو واضح پیغام دیا کہ ملکی دفاع ناقابلِ تسخیر ہے۔ بھارت کے پانچ ایٹمی دھماکوں کے جواب میں پاکستان نے 6 ایٹمی دھماکے کر کے خطے میں طاقت کا توازن بحال کیا۔ چاغی کے پہاڑوں سے گونجتی "اللہ اکبر" کی صدا آج بھی قوم کے دلوں میں تازگی اور ولولہ پیدا کرتی ہے۔

آج کے دن کی مناسبت سے ملک بھر میں عام تعطیل کا اعلان کیا گیا ہے، جبکہ سرکاری و نجی سطح پر خصوصی تقریبات، سیمینارز، دعائیہ اجتماعات اور تقریری مقابلوں کا انعقاد کیا جا رہا ہے۔ ان تقریبات میں وطن عزیز کے دفاع میں کردار ادا کرنے والے سائنسدانوں، افواجِ پاکستان، اور دیگر متعلقہ اداروں کو زبردست خراجِ تحسین پیش کیا جا رہا ہے۔

صدرِ مملکت، وزیراعظم، اور آرمی چیف سمیت دیگر اعلیٰ حکام نے یومِ تکبیر کے موقع پر اپنے خصوصی پیغامات میں قوم کو مبارکباد دی ہے اور اس عزم کا اعادہ کیا ہے کہ پاکستان کا دفاع ہر صورت میں مقدم رکھا جائے گا۔

قوم آج اس دن کو اس عہد کی تجدید کے طور پر منا رہی ہے کہ مادرِ وطن کی خودمختاری، سلامتی اور وقار پر کوئی آنچ نہیں آنے دی جائے گی۔