سانول عیسیٰ خیلوی نے اپنے والد کے ساتھ گیت 'تھیوا' کا پرومو جاری کر دیا

لاہور : مشہور فوک گلوکار عطا اللہ خان عیسیٰ خیلوی کی فنی وراثت ان کے بیٹے سانول عیسیٰ خیلوی نے سنبھال لی ہے۔ باپ بیٹے کی مشترکہ کوشش کا پہلا تحفہ، لیجنڈری گیت 'تھیوا' کے نئے انداز میں ریکارڈ شدہ ورژن کا پرومو سامنے آ گیا ہے۔

اس پرومو میں عطا اللہ عیسیٰ خیلوی کی یادگار پرفارمنس کی جھلکیاں بھی شامل ہیں، جسے مداحوں نے بہت پسند کیا ہے اور سوشل میڈیا پر کافی تعریف ہو رہی ہے۔

'تھیوا' کا یہ ریمیک سانول عیسیٰ خیلوی نے اپنے والد کے ساتھ مل کر بنایا ہے، جس میں پرانی کلاسک دُھن اور جدید موسیقی کا خوبصورت امتزاج سننے کو ملے گا۔ یہ ورژن نہ صرف پرانے شائقین کے دلوں کو خوش کرے گا بلکہ نئی نسل کو بھی پسند آئے گا۔

گانے 'تھیوا' کا مکمل ورژن جلد ریلیز کیا جائے گا، جس کا انتظار شائقین بے صبری سے کر رہے ہیں۔یہ موسیقی کا حسین ملاپ نہ صرف عیسیٰ خیلوی خاندان کی وراثت کو زندہ رکھے گا بلکہ پاکستانی فوک موسیقی کو بھی نئی جان دے گا۔