پی ایس ایل 10: کوئٹہ گلیڈی ایٹرز نے ملتان سلطانز کو 10 وکٹوں سے تاریخی شکست دے دی

لاہور: پاکستان سپر لیگ (پی ایس ایل) سیزن 10 کے 18ویں میچ میں کوئٹہ گلیڈی ایٹرز نے ملتان سلطانز کو 10 وکٹوں سے عبرتناک شکست دے کر تاریخ رقم کر دی۔ لاہور کے قذافی اسٹیڈیم میں کھیلے گئے اس مقابلے میں گلیڈی ایٹرز نے سلطانز کی جانب سے دیا گیا محض 90 رنز کا ہدف صرف 8.1 اوورز میں حاصل کر لیا۔

کوئٹہ کی جانب سے اوپنرز فن ایلن اور سعود شکیل نے شاندار بیٹنگ کا مظاہرہ کیا۔ فن ایلن نے 21 گیندوں پر ناقابل شکست 45 رنز بنائے، جبکہ سعود شکیل نے 20 گیندوں پر 42 رنز کی عمدہ اننگز کھیلی۔ دونوں بلے بازوں نے بغیر کسی نقصان کے ہدف حاصل کر کے ٹیم کو ایک یادگار فتح دلائی۔

میچ کی ابتدا میں ملتان سلطانز نے ٹاس جیت کر پہلے بیٹنگ کا فیصلہ کیا، جو ان کے حق میں ثابت نہ ہوا۔ خُرم شہزاد نے تباہ کن بولنگ کرتے ہوئے ابتدائی 4 اوورز میں 4 وکٹیں حاصل کیں۔ ملتان کے ابتدائی بلے باز یاسر خان (5)، عثمان خان (0)، کامران غلام (3) اور کرٹس کیمفر (4) جلد پویلین لوٹ گئے۔

کپتان محمد رضوان نے کچھ مزاحمت کی کوشش کی اور 44 رنز کی اننگز کھیلی، لیکن دوسرے اینڈ سے وکٹیں گرنے کا سلسلہ جاری رہا۔ فہیم اشرف نے دو اہم وکٹیں حاصل کیں، جبکہ محمد وسیم جونیئر نے بھی دو کھلاڑیوں کو آؤٹ کیا۔ عثمان میر اور محمد حسنین رن آؤٹ ہوئے اور پوری ٹیم 17 اوورز میں صرف 89 رنز پر ڈھیر ہو گئی۔

جواب میں، کوئٹہ گلیڈی ایٹرز کے بلے بازوں نے ابتدا ہی سے جارحانہ انداز اپنایا۔ خاص طور پر دوسرے اوور میں فن ایلن نے ڈیوڈ ویلی کو نشانہ بناتے ہوئے دو چھکے اور ایک چوکا لگایا، جس سے ٹیم کو تیز رفتار آغاز ملا۔ پاور پلے کے اختتام تک کوئٹہ کا اسکور 74 رنز بغیر کسی نقصان کے تھا۔

یہ کوئٹہ گلیڈی ایٹرز کی پی ایس ایل تاریخ میں پہلی 10 وکٹوں سے فتح تھی، جو ان کے لیے ایک اہم سنگِ میل ثابت ہوئی۔ اس کامیابی کے ساتھ کوئٹہ نے لیگ میں چوتھی فتح حاصل کر کے پوائنٹس ٹیبل پر اپنی پوزیشن کو مستحکم کر لیا۔