پی ٹی آئی والے مقدس مقامات کا احترام نہیں کرتے اسمبلی کا کیا کریں گے، سپیکر پنجاب اسمبلی

لاہور: سپیکر پنجاب اسمبلی ملک محمد احمد خان نے خیبرپختونخوا سے آنے والے افراد اور پی ٹی آئی کے اقدامات پر سخت تنقید کی ہے۔ لاہور میں ایک پریس کانفرنس کے دوران انہوں نے کہا کہ خیبرپختونخوا کے وزیراعلیٰ کی آمد پر خوشی ہوئی لیکن ساتھ ہی یہ بھی کہا کہ جو لوگ پنجاب اسمبلی میں گھیراؤ جلاؤ کی کارروائیوں میں ملوث ہیں، ان کا اسمبلی میں داخلہ غیر قانونی تھا۔

ملک محمد احمد خان نے واضح کیا کہ پنجاب اسمبلی میں کسی بھی کارروائی کی اجازت قوانین کے تابع ہے اور ایوان کی کارروائی رولز کے مطابق چلائی جاتی ہے۔ انہوں نے کہا کہ پنجاب اسمبلی ایک جمہوری ادارہ ہے اور اس کے تقدس کی حفاظت کے لیے سکیورٹی اقدامات کیے گئے ہیں۔ ان کا کہنا تھا کہ کسی کو بھی پنجاب اسمبلی کی حدود میں غیر قانونی طور پر داخل ہونے یا اس کے تقدس کو پامال کرنے کی اجازت نہیں دی جا سکتی۔

انہوں نے پی ٹی آئی کے حوالے سے کہا کہ یہ جماعت مقدس مقامات کا احترام نہیں کرتی، اور کسی کو یہ حق نہیں دیا جا سکتا کہ وہ پنجاب اسمبلی کی عمارت میں گھیراؤ جلاؤ کرے اور اسے سیاسی حق سمجھے۔ سپیکر نے کہا کہ "پنجاب اسمبلی کو میرے گھر کی طرح سمجھا جائے، اور کسی کو بھی اس کی حدود میں غیر قانونی طور پر قدم رکھنے کی اجازت نہیں دی جا سکتی۔"

ملک محمد احمد خان نے 9 مئی کے واقعات کا حوالہ دیتے ہوئے کہا کہ یہ عوامی ردعمل نہیں تھا، بلکہ ایک منصوبہ بندی تھی۔ انہوں نے کہا کہ یہ حملے سیاسی دفاتر اور فوجی تنصیبات پر کیے گئے جو کہ ملکی سلامتی کے خلاف تھے۔

سپیکر نے کہا کہ پنجاب اسمبلی کی سی سی ٹی وی مانیٹرنگ کی جاتی ہے اور ان کے مطابق اسمبلی کے ہر کونے کی حفاظت کی جاتی ہے۔ ان کا کہنا تھا کہ وہ ایک ہائی پاور انکوائری کمیٹی کے ذریعے اس واقعے کی تحقیقات کر رہے ہیں تاکہ اس معاملے کی حقیقت سامنے آ سکے۔