ڈیرہ غازی خان : پنجاب پولیس نے عیدالفطر کی آمد سے قبل سکیورٹی کو مزید مؤثر بنانے کے لیے ڈیرہ غازی خان کے سرحدی علاقے میں واقع لکھانی چیک پوسٹ پر دہشت گردوں کا حملہ ناکام بنایا۔
ترجمان پنجاب پولیس کے مطابق، 20 سے 25 خوارجی دہشت گردوں نے لکھانی چیک پوسٹ پر چاروں اطراف سے حملہ کیا اور مارٹر گولے، راکٹ لانچرز سمیت بھاری اسلحے کا استعمال کیا، تاہم پولیس، ایلیٹ فورس اور ایس او یو کے جوانوں نے بہادری کا مظاہرہ کرتے ہوئے چیک پوسٹ کا دفاع کیا۔ پولیس کی جوابی کارروائی میں ایک دہشت گرد ہلاک اور متعدد زخمی ہو گئے، جبکہ پولیس کے تمام جوان محفوظ رہے۔
آئی جی پنجاب ڈاکٹر عثمان انور نے ڈیرہ غازی خان پولیس کو دہشت گردوں کے خلاف کامیاب کارروائی پر سراہا اور مزید آپریشنز جاری رکھنے کی ہدایت دی۔ آر پی او ڈیرہ غازی خان کیپٹن (ر) سجاد حسن خان نے آپریشن کی نگرانی کی، جبکہ ڈی پی او سید علی کی قیادت میں کیو آر ایف ٹیموں نے بروقت کارروائی کی۔
