لاہور: پاکستان میں کورونا ویکسی نیشن کا عمل مزید تیز کر دیا گیا ، ملک بھر میں آج سے 30 سال سے زائد عمر کے افراد کی واک اِن ویکسی نیشن شروع ہو گئی ۔
تفصیلات کے مطابق 30 سال اور اس سے زائد عمر کے تمام افراد آج سے کسی بھی سنٹر پر جا کر کورونا ویکسین لگوا سکتے ہیں ۔ کورونا ویکسین فائزر کی پہلی کھیپ بھی پاکستان پہنچ گئی ۔
ادھر ملک میں چوبیس گھنٹوں کے دوران کورونا سے مزید 73 افراد جان کی بازی ہار گئے ہیں جس کے بعد اموات کی تعداد 20 ہزار ، 680 ہوگئی ہے ۔ جبکہ 2 ہزار ، 455 نئے کیس رپورٹ ہو گئے ہیں ۔
این سی او سی کے تازہ ترین اعداد و شمار کے مطابق چوبیس گھنٹے کے دوران ملک بھر میں 55 ہزار ، 442 ٹیسٹ کیے گئے جبکہ مثبت شرح 4.42 فیصد رہی ۔
میڈیا رپورٹ کے مطابق کورونا وائرس کی بھارتی قسم بھی پاکستان پہنچ گئی ہے ۔ وزارت قومی صحت نے کورونا کی جنوبی افریقی قسم کے سات اور بھارتی قسم کے ایک کیس کی تصدیق کر دی ہے ۔