جان سینا کا ریسلنگ سے ریٹائرمنٹ کا اعلان، وجہ بھی بتا دی

ٹورنٹو: ورلڈ ریسلنگ انٹرٹینمنٹ (ڈبلیو ڈبلیو ای) کے عالمی شہرت یافتہ ریسلر جان سینا نے 2025 کے اختتام پر ریسلنگ سے ریٹائرمنٹ لینے کا اعلان کر دیا ہے۔ انہوں نے یہ اعلان کینیڈا کے شہر ٹورنٹو میں ہونے والے مشہور ایونٹ منی ان دی بینک کے دوران کیا۔

جان سینا نے اپنے شاندار کیریئر میں 17 مرتبہ عالمی چیمپئن بننے کا ریکارڈ قائم کیا — جو کہ ڈبلیو ڈبلیو ای کی تاریخ میں ایک نئی مثال ہے۔ وہ 2001 میں ریسلنگ کی دنیا میں داخل ہوئے اور جلد ہی کمپنی کا چہرہ بن گئے۔

ایونٹ کے دوران جان سینا نے اپنی ریٹائرمنٹ کی وجہ بتاتے ہوئے کہا کہ     "اب میرا جسم وہ طاقت نہیں رکھتا جو پہلے تھی۔ میں وہ کارکردگی نہیں دکھا سکتا جو ایک چیمپئن کو دکھانی چاہیے۔انہوں نے مزید کہا کہ ریسلنگ کا سفر آسان نہیں ہوتا اور ہر بار رنگ میں اترنے کے لیے جسمانی اور ذہنی طور پر مکمل تیار ہونا پڑتا ہے، لیکن اب وقت آ گیا ہے کہ وہ پیچھے ہٹ جائیں۔

جان سینا نے اپنا آخری بڑا مقابلہ ریسل مینیا 41 میں لڑا، جہاں انہوں نے کوڈی روڈز کو شکست دے کر 17ویں مرتبہ عالمی چیمپئن بننے کا اعزاز حاصل کیا۔ اس جیت کے ساتھ ہی انہوں نے ریک فلئیر کا 16 مرتبہ کا ریکارڈ بھی توڑ دیا۔

سینا نے واضح کیا کہ وہ مکمل طور پر ڈبلیو ڈبلیو ای سے الگ نہیں ہوں گے بلکہ بطور مینٹر یا کوچ کمپنی کے ساتھ کام جاری رکھیں گے۔ ان کا کہنا تھا کہ   میں چاہتا ہوں کہ جو کچھ میں نے سیکھا، وہ نئی نسل کے ریسلرز کو منتقل کروں۔

جان سینا کو نہ صرف ان کے رِنگ میں مظاہرہ بلکہ ان کے کردار، سوشل ورک اور نوجوانوں میں مقبولیت کے باعث بھی یاد رکھا جائے گا۔ ان کی ریٹائرمنٹ کو ڈبلیو ڈبلیو ای کے لیے ایک دور کا اختتام اور نئی نسل کے لیے آغاز قرار دیا جا رہا ہے۔