پاکستان میں پہلا بین الاقوامی ڈرائیونگ لائسنس کیوسک لاہور ائیرپورٹ پر قائم

لاہور: علامہ اقبال انٹرنیشنل ائیرپورٹ پر بین الاقوامی ڈرائیونگ لائسنس کے حصول کے لیے ملک کا پہلا خودکار کیوسک نصب کر دیا گیا ہے۔ اس کیوسک کا افتتاح چیف ٹریفک آفیسر (سی ٹی او) ڈاکٹر اطہر وحید نے انجام دیا۔

ڈاکٹر اطہر وحید کے مطابق، اب بیرون ملک جانے والے مسافر ائیرپورٹ پر ہی چند منٹوں میں اپنا انٹرنیشنل ڈرائیونگ لائسنس حاصل کر سکتے ہیں۔ یہ سہولت ملک میں پہلی مرتبہ کسی ہوائی اڈے پر مہیا کی گئی ہے۔

سی ٹی او نے وضاحت کی کہ بین الاقوامی لائسنس حاصل کرنے کے خواہشمند افراد کے پاس پہلے سے موجود قومی ڈرائیونگ لائسنس ہونا ضروری ہے۔ انہوں نے مزید بتایا کہ کیوسک سے ڈرائیونگ سے متعلق دیگر سہولیات بھی دستیاب ہوں گی۔

ان کا کہنا تھا کہ شہر کے اہم مقامات پر بھی اس طرز کے کیوسک لگائے جا رہے ہیں تاکہ شہریوں اور ٹریفک وارڈنز کو آسانیاں فراہم کی جا سکیں، جب کہ مستقبل قریب میں ائیرپورٹ پر قائم کیوسک میں مزید سہولیات کا اضافہ کیا جائے گا۔