صائمہ نور کی شاندار فٹنس نٹرانسفارمیشن نے مداحوں کو حیران کر دیا

لاہور: پاکستان کی معروف سینئر اداکارہ صائمہ نور اپنی حیرت انگیز فٹنس ٹرانسفارمیشن اور بھرپور توانائی کے باعث ایک بار پھر سوشل میڈیا پر توجہ کا مرکز بن گئی ہیں۔

سوشل میڈیا پر گردش کرنے والی ویڈیوز میں 58 سالہ اداکارہ کو مختلف سخت ورزشیں کرتے دیکھا جا سکتا ہے، جن میں سکواٹس، کیٹل بیل سوئنگز اور دیگر جسمانی مشقیں شامل ہیں۔ ان کی فٹنس، طاقت اور چستی نے مداحوں کو بے حد متاثر کیا، جبکہ صارفین نے ان کے صحت مند طرزِ زندگی کو خوب سراہا۔

کچھ دیگر ویڈیوز میں صائمہ نور کو ایک بیوٹی سیلون کے دورے کے دوران بھی دیکھا گیا، جہاں ان کی نمایاں وزن میں کمی واضح طور پر نظر آئی۔ مداحوں نے انہیں "ایور گرین" قرار دیتے ہوئے ان کی جوان اور تازہ دم شخصیت کی تعریف کی، جبکہ چند صارفین نے مزاحیہ انداز میں کہا کہ ان کی ویڈیوز اتنی متاثر کن ہیں کہ گویا مصنوعی ذہانت (AI) کے ذریعے تیار کی گئی ہوں۔

ان ویڈیوز کے وائرل ہونے کے بعد صائمہ نور کے ماضی کے انٹرویوز بھی دوبارہ زیرِ گردش آ گئے، جن میں انہوں نے اپنی صحت، ورزش اور فٹنس روٹین کے بارے میں تفصیل سے گفتگو کی تھی۔

اداکارہ کے مطابق ایک وقت ایسا بھی آیا جب انہیں محسوس ہوا کہ ان کا وزن معمول سے بڑھ گیا ہے، جس کے بعد انہوں نے اپنی روزمرہ زندگی میں مثبت تبدیلیاں لانے کا فیصلہ کیا۔ انہوں نے بتایا کہ وہ کسی سخت یا پیچیدہ ڈائٹ پلان پر عمل نہیں کرتیں، بلکہ متوازن غذا مناسب مقدار میں استعمال کرتی ہیں اور انٹرمیٹنٹ فاسٹنگ کو اپنی روزمرہ عادت کا حصہ بنا چکی ہیں۔

صائمہ نور کا کہنا ہے کہ مسلسل ورزش، ذہنی سکون اور نظم و ضبط پر مبنی طرزِ زندگی نے نہ صرف ان کی جسمانی فٹنس اور توانائی کو بحال کیا بلکہ انہیں ایک صحت مند، متحرک اور تروتازہ زندگی گزارنے میں بھی مدد دی۔