فواد خان کا نیا انداز سوشل میڈیا پر وائرل، مداحوں نے تبدیلی کی وجہ تلاش کر لی

لاہور : پاکستان کے معروف اداکار فواد خان اپنی حالیہ تصاویر کے باعث ایک بار پھر سوشل میڈیا پر موضوعِ بحث بن گئے ہیں۔ ان کی بدلی ہوئی شکل اور نئے انداز نے مداحوں کو حیران کر دیا، جس کے بعد بعض صارفین نے کاسمیٹک ٹریٹمنٹ سے متعلق قیاس آرائیاں شروع کر دیں۔

فواد خان ان دنوں اپنی نئی فلم کی شوٹنگ میں مصروف ہیں، جس میں عائزہ خان بھی مرکزی کردار ادا کر رہی ہیں۔ فلم میں سیکیورٹی فورسز کے افسر کا کردار نبھانے کے لیے انہوں نے اپنے بال مختصر کر لیے ہیں، جس سے ان کی شخصیت میں نمایاں تبدیلی نظر آ رہی ہے۔

حال ہی میں سامنے آنے والی تصاویر میں فواد خان کو لاہور کے ایک معروف کاسمیٹک سرجن کے ساتھ بھی دیکھا گیا، جس کے بعد سوشل میڈیا پر بوٹوکس، فلرز اور دیگر جمالیاتی طریقۂ علاج سے متعلق مختلف تبصرے کیے جانے لگے۔ تاہم اداکار  کی جانب سے ان قیاس آرائیوں پر کوئی باضابطہ ردعمل سامنے نہیں آیا۔

دوسری جانب کئی مداحوں کا کہنا ہے کہ ان کی نئی شکل محض نئے ہیئر سٹائل، وزن میں کمی اور بہتر فٹنس کا نتیجہ ہو سکتی ہے۔ بعض صارفین نے ان کے وزن میں نمایاں کمی پر بھی تبصرے کیے، تاہم اس حوالے سے گردش کرنے والے تمام دعوؤں کی آزادانہ طور پر تصدیق نہیں ہو سکی۔