دوسرا ٹی 20: پاکستان کی جنوبی افریقا کو 9 وکٹو ں سے شکست، سیریز 1-1 سے برابر

لاہور: پاکستان نے دوسرے ٹی20 میچ میں جنوبی افریقا کو 9 وکٹوں سے شکست دے کر تین میچز کی سیریز 1-1 سے برابر کر دی۔

جنوبی افریقا کی جانب سے 111 رنز کے ہدف کا تعاقب کرتے ہوئے پاکستان نے صرف ایک وکٹ کے نقصان پر 14 اوورز میں ہدف حاصل کر لیا۔

پاکستان کے کپتان سلمان علی آغا نے ٹاس جیت کر جنوبی افریقا کو پہلے بیٹنگ کی دعوت دی، اور ان کی ٹیم کے بولرز نے شاندار کارکردگی کا مظاہرہ کرتے ہوئے پروٹیز کو صرف 110 رنز پر آؤٹ کر دیا۔

پاکستانی ٹیم میں ایک تبدیلی کی گئی تھی، جس میں شاہین آفریدی کی جگہ سلمان مرزا کو شامل کیا گیا۔

جنوبی افریقا کے بیٹرز پاکستان کے تیز بولرز کے سامنے مشکلات کا شکار رہے اور کوئی بھی کھلاڑی زیادہ دیر تک بیٹنگ نہ کر سکا۔ اس کے نتیجے میں پروٹیز کی ٹیم 19.2 اوورز میں 110 رنز پر آؤٹ ہو گئی۔

جنوبی افریقا کی جانب سے ڈیوالڈ بریوس نے 25 اور ڈونون فریرا نے 15 رنز بنائے، جبکہ کاربن بوش اور بارٹ مین نے بالترتیب 11 اور 12 رنز کی مدد فراہم کی۔

فہیم اشرف نے شاندار بولنگ کرتے ہوئے 4 وکٹیں حاصل کیں اور 23 رنز دے کر سب سے کامیاب بولر رہے۔ سلمان مرزا نے 14 رنز دے کر 3 کھلاڑیوں کو آؤٹ کیا، جبکہ نسیم شاہ نے 2 اور ابرار احمد نے 1 وکٹ حاصل کی۔

پاکستان نے جنوبی افریقا کا 111 رنز کا ہدف 14 اوورز میں صرف ایک وکٹ کے نقصان پر پورا کر لیا۔

صاحبزادہ فرحان نے 28 رنز بنائے، جبکہ صائم ایوب نے 38 گیندوں پر 71 رنز کی شاندار اننگز کھیلی۔ بابر اعظم 11 رنز پر ناقابل شکست رہے۔

اس شاندار فتح کے ساتھ پاکستان نے سیریز 1-1 سے برابر کر دی، اور سیریز کا فیصلہ کن میچ کل لاہور میں ہی کھیلا جائے گا۔