وزیراعلٰی پنجاب مریم نواز کی چین کی پیپلز لبریشن آرمی کو یومِ تاسیس پر مبارکباد

لاہور : وزیراعلیٰ پنجاب مریم نواز شریف نے چین کی پیپلز لبریشن آرمی کے 98ویں یومِ تاسیس پر حکومتِ چین، چینی عوام اور مسلح افواج کو مبارکباد پیش کی۔ انہوں نے کہا کہ چین کی مسلح افواج کا قومی و عالمی امن کے لیے کردار نہایت قابل تحسین ہے۔

مریم نواز کا کہنا تھا کہ "ہم اپنے آہنی بھائی کو سلام پیش کرتے ہیں"۔ انہوں نے یہ بھی کہا کہ پاک چین تعلقات صرف ریاستی یا دفاعی مفادات تک محدود نہیں ہیں، بلکہ یہ دلوں کے رشتے ہیں۔ پاک چین دفاعی اشتراک ایک لازوال دوستی کی روشن علامت ہے۔

انہوں نے پیپلز لبریشن آرمی کی پیشہ ورانہ مہارت، جدید عسکری حکمت عملی اور قومی خدمت کے جذبے کو مثالی قرار دیتے ہوئے کہا کہ پاک چین مسلح افواج کے درمیان باہمی اعتماد، تربیتی تعاون اور دفاعی اشتراک وقت کے ساتھ مزید مستحکم ہوا ہے۔

مریم نواز نے مزید کہا کہ پنجاب حکومت چین کے ساتھ صنعتی ترقی، ماحولیات، زراعت اور تعلیم میں مشترکہ منصوبوں کو مزید فروغ دینے کے لیے پرعزم ہے۔ یہ بیان پاکستان اور چین کے درمیان تعلقات کی مزید گہرائی اور تعاون کی عکاسی کرتا ہے۔