پیٹرولیم مصنوعات کی قیمتوں میں اضافہ: عالمی منڈی نہیں، وجہ مقامی محصولات کا ہاتھ

کراچی : حکومت نے اچانک پیٹرولیم مصنوعات کی قیمتوں میں اضافہ کر دیا ہے، جس کے تحت پیٹرول کی قیمت میں 4.07 روپے اور ڈیزل کی قیمت میں 4.04 روپے اضافہ کیا گیا ہے۔ اب پیٹرول کی قیمت 268.68 روپے فی لیٹر اور ڈیزل کی قیمت 276.81 روپے فی لیٹر ہو گئی ہے۔

تاہم، اس اضافے کی اصل وجہ تیل کی عالمی قیمتیں نہیں بلکہ پیٹرول اور ڈیزل پر عائد فریٹ مارجن اور کسٹمز ڈیوٹی میں اضافہ ہے۔ فریٹ مارجن، جو کہ ترسیلی لاگت ہے، پیٹرول پر 2.40 روپے اور ڈیزل پر 2.09 روپے بڑھا دیا گیا ہے۔ اس کا مطلب یہ ہے کہ ٹینکر کرایہ، ڈرائیور کی اجرت اور دیگر متعلقہ اخراجات صارفین پر منتقل کر دیے گئے ہیں۔

علاوہ ازیں، کسٹمز ڈیوٹی میں بھی پیٹرول پر 1.35 روپے اور ڈیزل پر 2.75 روپے کا اضافہ کیا گیا ہے، جس کے باعث قیمتوں میں مزید اضافہ ہوا۔ ڈیزل پر ایکسچینج ریٹ ایڈجسٹمنٹ کے باعث کچھ کمی تو ہوئی، مگر فریٹ مارجن اور دیگر محصولات کی وجہ سے قیمتوں میں اضافہ برقرار ہے۔

وزارت خزانہ کے مطابق کاربن لیوی اور دیگر مارجنز میں کوئی تبدیلی نہیں کی گئی۔ یوں عالمی منڈی کی قیمتیں کم ہونے کے باوجود مقامی عوامل کی وجہ سے قیمتوں میں اضافہ ہوا ہے۔