جوڈیشل کمیشن کا اجلاس،سندھ اور بلوچستان ہائی کورٹس کے چیف جسٹسز کے ناموں کا اعلان

اسلام آباد: چیف جسٹس یحییٰ آفریدی کی زیر صدارت جوڈیشل کمیشن کا اجلاس ہوا جس میں کئی اہم عدلیہ تقرریوں کا فیصلہ کیا گیا۔ ذرائع کے مطابق، جسٹس ظفر احمد راجپوت کو سندھ ہائی کورٹ کا چیف جسٹس مقرر کرنے کی منظوری دی گئی ہے۔ یہ فیصلہ اب صدر کی منظوری کے لیے وزارت قانون کو بھیج دیا گیا ہے۔

اجلاس میں سپریم کورٹ میں مستقل جج کی تعیناتی کے حوالے سے بھی اہم فیصلے کیے گئے۔ جسٹس میاں گل حسن کو سپریم کورٹ میں مستقل جج مقرر کرنے کا فیصلہ کیا گیا۔ اس کے ساتھ ہی، اسلام آباد ہائی کورٹ کے تین سینئر ججز کے ناموں پر بھی غور کیا گیا، اور ان کی تقرری کے حوالے سے وزارت قانون کو آگاہ کر دیا گیا۔

بلوچستان ہائی کورٹ کے چیف جسٹس کے طور پر جسٹس کامران ملاخیل کی تقرری کی منظوری بھی دی گئی۔ جوڈیشل کمیشن نے اس معاملے پر بھی صدر کی منظوری کے لیے وزارت قانون کو باقاعدہ درخواست بھیج دی ہے۔