پہلگام واقعہ: پاکستان کی جانب سے اقوام متحدہ سے تحقیقات کے لیے کمیشن کی تجویز

اسلام آباد: پاکستان نے بھارت کے زیر انتظام علاقے پہلگام میں ہونے والے واقعے کی تحقیقات کے لیے اقوام متحدہ سے کمیشن بنانے کی پیشکش کی ہے۔ وزیر دفاع خواجہ آصف نے  نجی ٹی وی کے پروگرام  میں  کہا کہ وزیراعظم شہباز شریف نے پہلے ہی بھارت کو تحقیقات کی پیشکش کی تھی، لیکن اب پاکستان چاہتا ہے کہ یا تو 2 یا 3 ممالک مشترکہ طور پر تحقیقات کریں، یا پھر اقوام متحدہ ایک تحقیقات کا کمیشن تشکیل دے۔

خواجہ آصف کا کہنا تھا کہ جو ملک بحران میں صاف اور شفاف ہو، وہ ہی تحقیقات کی پیشکش کرتا ہے، لیکن بھارت اس پیشکش کو اس لیے رد کر رہا ہے کہ اسے خوف ہے کہ تحقیقات میں کچھ اور بے نقاب نہ ہو جائے۔ وزیر دفاع نے یہ بھی کہا کہ حالیہ کشیدگی کے باوجود بات چیت کا دروازہ کبھی بند نہیں ہونا چاہیے، کیونکہ دنیا بھر کی اہم طاقتیں جیسے امریکا، روس، چین اور ترکیہ نے اس مسئلے کے حل کے لیے مذاکرات کے آغاز کی حمایت کی ہے۔

انہوں نے یہ بھی کہا کہ پہلگام میں ہونے والے واقعے کی ایف آئی آر فوری طور پر درج کی گئی، جس سے اس واقعے کی ساکھ پر سوالات اٹھ گئے ہیں، اور بھارت کے اندر سے ہی اس کی صداقت پر شبہات ظاہر کیے جا رہے ہیں۔