آبنائے ہرمز پر کنٹرول کی جنگ: ڈونلڈ ٹرمپ کا سمندری گزرگاہ کھولنے اور دولت کمانے کا بڑا دعویٰ

واشنگٹن: سابق امریکی صدر ڈونلڈ ٹرمپ نے آبنائے ہرمز کے حوالے سے ایک نیا اور سنسنی خیز دعویٰ کر دیا ہے۔ سوشل میڈیا پر جاری اپنے ایک بیان میں ڈونلڈ ٹرمپ نے کہا ہے کہ امریکہ انتہائی آسانی کے ساتھ آبنائے ہرمز کو کھول سکتا ہے۔
ڈونلڈ ٹرمپ کا کہنا تھا کہ ہم نہ صرف آبنائے ہرمز کو باآسانی کھول سکتے ہیں بلکہ وہاں سے بلا تعطل تیل کی ترسیل کو ممکن بنا کر کثیر دولت بھی کما سکتے ہیں۔ ان کے اس بیان نے عالمی منڈیوں اور سیاسی حلقوں میں ایک نئی بحث چھیڑ دی ہے، کیونکہ آبنائے ہرمز عالمی تیل کی تجارت کے لیے ریڑھ کی ہڈی کی حیثیت رکھتی ہے۔
دوسری جانب، معروف امریکی اخبار وال سٹریٹ جرنل نے ایک تجزیاتی رپورٹ شائع کی ہے جس میں کہا گیا ہے کہ امریکہ کی نظریں ایران کی اس اہم ترین آبی گزرگاہ پر مستقل اثر و رسوخ حاصل کرنے پر جمی ہوئی ہیں۔ رپورٹ کے مطابق     آبنائے ہرمز پر کنٹرول حاصل کرنا محض معاشی مفاد نہیں بلکہ یہ خطے میں کسی بھی ممکنہ جنگ کے نتیجے کا تعین کرنے والا کلیدی عنصر ثابت ہوگا۔    امریکہ اس گزرگاہ پر اپنی گرفت مضبوط کر کے عالمی توانائی کی سپلائی لائن کو اپنے قبضے میں رکھنا چاہتا ہے۔
آبنائے ہرمز ایران اور عمان کے درمیان واقع ایک ایسی تنگ گزرگاہ ہے جہاں سے دنیا کے کل تیل کا تقریباً پانچواں حصہ گزرتا ہے۔ ماہرین کا کہنا ہے کہ اس مقام پر کسی بھی قسم کا فوجی کنٹرول یا مداخلت عالمی معیشت اور علاقائی استحکام پر گہرے اثرات مرتب کر سکتی ہے۔ ڈونلڈ ٹرمپ کا یہ حالیہ بیان اسٹریٹجک لحاظ سے انتہائی اہم تصور کیا جا رہا ہے۔