اسرائیلی فورسز کی ریاستی دہشت گردی جاری، مزید 3 فلسطینی شہید

غزہ: اسرائیلی فوج کے فضائی حملوں میں 24 گھنٹوں کے دوران مزید تین فلسطینی شہید ہو گئے ہیں، جس کے بعد فلسطینیوں کی شہادتوں کا سلسلہ جاری ہے۔ فلسطینی شہریوں کی جانوں کا ضیاع اور انسانی بحران میں مسلسل اضافہ ہو رہا ہے۔

اس دوران، غزہ کی رفاہ کراسنگ کو شہریوں کی آمدورفت کے لیے کھول دیا گیا ہے۔ مصری ایمبولینس اور امدادی ٹرک غزہ کی طرف روانہ ہو گئے ہیں تاکہ زخمیوں کو علاج کی سہولت فراہم کی جا سکے۔ تاہم، غزہ سے باہر موجود بڑی تعداد میں فلسطینی رفاہ کراسنگ پہنچ گئے ہیں۔

پابندیوں کے باوجود، روزانہ 150 فلسطینیوں کو سرحد پار کرنے کی اجازت دی جائے گی، تاہم بیرون ملک علاج کے منتظر صرف 5 مریضوں کو ہی باہر جانے کی اجازت ملے گی۔ رفاہ بارڈر کی بندش کے نتیجے میں ادویات کی کمی اور علاج کے انتظار میں 1,268 فلسطینی اپنی جان کی بازی ہار چکے ہیں۔

اسی دوران، اسرائیل نے بین الاقوامی امدادی تنظیم "ڈاکٹرز ود آؤٹ بارڈرز" کو غزہ میں کام کرنے سے روک دیا ہے، جس سے علاقے میں طبی امداد کی فراہمی میں مزید مشکلات پیش آ سکتی ہیں۔