وزیراعظم شہباز شریف کی قیادت میں ن لیگی وفد نے 27ویں آئینی ترمیم کی منظوری کیلئےپی پی پی کی حمایت مانگی،بلاول بھٹو

اسلام آباد : پاکستان پیپلز پارٹی کے چیئرمین بلاول بھٹو زرداری نے کہا ہے کہ وزیراعظم شہباز شریف کی سربراہی میں مسلم لیگ ن کے وفد نے پیپلز پارٹی کے شریک چیئرمین، صدر آصف علی زرداری اور ان سے ملاقات کی، جس دوران وزیراعظم نے 27ویں آئینی ترمیم کی حمایت کی درخواست کی۔

سوشل میڈیا پر اپنے بیان میں بلاول بھٹو نے بتایا کہ ترمیم میں آئینی عدالت کے قیام، ایگزیکٹو مجسٹریٹس اور ججز کے تبادلے کی تجویز پیش کی گئی ہے۔ انہوں نے مزید کہا کہ 27ویں ترمیم میں این ایف سی ایوارڈ میں صوبوں کے حصے کے تحفظ کو ختم کرنے کا بھی ذکر کیا گیا ہے۔ اس کے علاوہ، آئین میں آرٹیکل 243 میں ترمیم اور وفاقی سطح پر تعلیم اور آبادی کی منصوبہ بندی کی واپسی بھی تجویز کی گئی ہے۔

بلاول بھٹو زرداری نے یہ بھی بتایا کہ اس ترمیم میں الیکشن کمیشن آف پاکستان (ای سی پی) کی تقرری پر ڈیڈ لاک کو توڑنے کی کوششیں بھی شامل ہیں۔ پیپلز پارٹی کی مرکزی قیادت نے اس معاملے پر مزید مشاورت کا عندیہ دیا ہے اور اس حوالے سے پارٹی پالیسی کا تعین کرنے کے لیے 6 نومبر کو پیپلز پارٹی کی سینٹرل ایگزیکٹو کمیٹی کا اجلاس بلانے کا اعلان کیا ہے۔