اسرائیلی فوج نے گریٹا تھنبرگ کی ویڈیو جاری کردی، وہ کون ہیں؟،"FreeGreta" کیوں ٹرینڈ کررہا ہے؟

غزہ :اسرائیلی فوج نے سویڈن سے تعلق رکھنے والی معروف ماحولیاتی کارکن گریٹا تھنبرگ کی ایک ویڈیو جاری کی ہے، جنہیں حال ہی میں غزہ کے لیے امداد لے جانے والے بحری قافلے گلوبل صمود فلوٹیلا میں شامل ہونے کے دوران حراست میں لیا گیا تھا۔

اسرائیلی وزارتِ خارجہ کی جانب سے یہ ویڈیو مختلف سوشل میڈیا پلیٹ فارمز پر شیئر کی گئی، جس میں گریٹا تھنبرگ کو دیگر رضاکاروں کے ہمراہ دکھایا گیا ہے۔ اسرائیلی حکام کے مطابق، ان افراد کو ایک اسرائیلی بندرگاہ پر منتقل کیا جا رہا ہے جہاں ان سے تفتیش جاری ہے۔

گریٹا تھنبرگ، جو دنیا بھر میں موسمیاتی تبدیلی کے خلاف جدوجہد کی علامت سمجھی جاتی ہیں، حالیہ برسوں میں فلسطینی عوام کے حقوق کے لیے بھی کھل کر آواز اٹھاتی رہی ہیں۔ ان کی فلوٹیلا میں شمولیت کو فلسطینیوں کے ساتھ یکجہتی کے ایک عملی اقدام کے طور پر دیکھا جا رہا ہے۔

ذرائع کے مطابق، امدادی قافلہ بین الاقوامی کارکنوں، انسانی حقوق کے نمائندوں اور ڈاکٹروں پر مشتمل تھا، جو غزہ میں جاری انسانی بحران کے پیشِ نظر خوراک، دوا اور دیگر ضروری اشیاء لے کر روانہ ہوا تھا۔ تاہم، اسرائیلی بحریہ نے بین الاقوامی پانیوں میں اس قافلے کو روک کر اپنے قبضے میں لے لیا۔

2003 میں سویڈن کے دارالحکومت اسٹاک ہوم میں پیدا ہونے والی گریٹا تھنبرگ کو عالمی سطح پر اس وقت شہرت ملی جب انہوں نے صرف 15 سال کی عمر میں اسکول چھوڑ کر سویڈن کی پارلیمنٹ کے باہر ماحولیاتی تبدیلی کے خلاف احتجاج شروع کیا۔ ان کی "Fridays for Future" نامی مہم نے دنیا بھر میں نوجوانوں کو متحرک کیا اور اقوام متحدہ سمیت کئی عالمی فورمز پر ان کی تقریریں توجہ کا مرکز بنیں۔

گریٹا کو ایسپرجر سنڈروم کی تشخیص بھی ہو چکی ہے، تاہم انہوں نے اپنی اس حالت کو کبھی رکاوٹ نہیں بننے دیا اور اپنی پراثر، صاف گو اور بےباک گفتگو کے انداز سے عالمی سطح پر پذیرائی حاصل کی۔ ماحولیاتی تحریک کے ساتھ ساتھ، وہ سماجی انصاف، انسانی حقوق اور اب فلسطینی کاز کے لیے بھی سرگرم ہیں۔

گریٹا تھنبرگ کی گرفتاری اور ویڈیو کے اجرا پر دنیا بھر میں انسانی حقوق کے کارکنوں اور ماحولیاتی تنظیموں کی جانب سے شدید ردِعمل متوقع ہے۔ کئی بین الاقوامی مبصرین نے اسرائیل کی اس کارروائی کو غیر قانونی اور انسانی امداد میں رکاوٹ قرار دیا ہے۔

اقوامِ متحدہ، یورپی یونین اور دیگر عالمی اداروں کی جانب سے بھی ممکنہ مذمتی بیانات کا انتظار کیا جا رہا ہے، جبکہ سوشل میڈیا پر بھی "FreeGreta" اور "StandWithGaza" جیسے ہیش ٹیگز ٹرینڈ کر رہے ہیں۔