پاکستان اور امریکا کی شراکت داری مشترکہ جذبے پر مبنی ہے: نائب امریکی ناظم الامور

اسلام آباد: امریکی ڈپٹی چیف آف مشن نیٹلی بیکر نے کہا ہے کہ پاکستان اور امریکا کے درمیان تعلقات محض سفارتی روابط نہیں بلکہ مشترکہ مفادات اور ایک مضبوط شراکت داری کی بنیاد پر قائم ہیں۔

اسلام آباد میں واقع امریکی سفارتخانے میں امریکا کی آزادی کی 250ویں سالگرہ کے موقع پر ایک خصوصی تقریب منعقد کی گئی، جس میں وزیراعظم شہباز شریف نے بطور مہمانِ خصوصی شرکت کی۔

تقریب سے خطاب کرتے ہوئے نیٹلی بیکر نے وزیراعظم کی شرکت کو سراہتے ہوئے کہا کہ یہ دونوں ممالک کے درمیان دوستانہ تعلقات اور باہمی احترام کی عکاسی کرتا ہے۔ انہوں نے کہا کہ پاکستان اور امریکا کئی دہائیوں پر محیط تعلقات رکھتے ہیں جو وقت کے ساتھ مزید مضبوط ہوئے ہیں۔

انہوں نے کہا کہ دونوں ممالک کے درمیان شراکت داری ایک مشترکہ جذبے سے جڑی ہوئی ہے، جس میں اعتماد، تعاون اور باہمی مفادات کو مرکزی حیثیت حاصل ہے۔ ان کے مطابق پاک امریکا تعلقات صرف ایک شعبے تک محدود نہیں بلکہ مختلف میدانوں میں پھیلے ہوئے ہیں۔

نیٹلی بیکر نے بتایا کہ ویزا سہولتوں، تجارتی روابط، سرمایہ کاری کے مواقع اور سیکیورٹی تعاون کے شعبوں میں دونوں ممالک کی ٹیمیں مسلسل محنت کر رہی ہیں تاکہ دوطرفہ تعلقات کو مزید وسعت دی جا سکے۔

انہوں نے مزید کہا کہ پاکستان نے خطے میں اہم سفارتی کردار ادا کیا ہے، جس کی ایک مثال اپریل میں اسلام آباد کی میزبانی میں ایران اور امریکا کے درمیان ہونے والے اعلیٰ سطح کے مذاکرات ہیں۔ ان کا کہنا تھا کہ ایسے اقدامات پاکستان کے تعمیری اور مثبت کردار کو اجاگر کرتے ہیں۔

تقریب کے اختتام پر دونوں ممالک کے درمیان تعلقات کو مزید مستحکم بنانے کے عزم کا اعادہ کیا گیا۔