پی ٹی اے کا صارفین کے حقوق کے تحفظ کے لیے کمپلینٹ مینجمنٹ سسٹم متعارف کرانے کا اعلان

اسلام آباد: پاکستان ٹیلی کمیونیکیشن اتھارٹی (پی ٹی اے) نے صارفین کی شکایات پر فوری طور پر ردعمل دیتے ہوئے غیر قانونی اور غیر مجاز ویلیو ایڈڈ سروسز (VAS) کی ایکٹیویشن کے حوالے سے باضابطہ ایڈوائزری جاری کر دی ہے۔

پی ٹی اے کے ترجمان نے بتایا کہ کچھ صارفین نے رپورٹ کیا کہ ان کے موبائل نمبرز پر بغیر اجازت ویلیو ایڈڈ سروسز چالو کی جا رہی ہیں۔ اس پر پی ٹی اے نے واضح کیا کہ کسی بھی صارف کی پیشگی منظوری کے بغیر کوئی ویلیو ایڈڈ سروس فعال نہیں کی جا سکتی۔

ایڈوائزری میں کہا گیا ہے کہ وی اے ایس کی ایکٹیویشن کے دوران ون ٹائم پاس ورڈ (OTP) کی تصدیق ضروری ہو گی، اور بغیر OTP کے کسی بھی سروس کو فعال نہیں کیا جا سکے گا۔ غیر مجاز سروسز کو سختی سے مسترد کیا گیا ہے۔

موبائل صارفین کو مشورہ دیا گیا کہ وہ مشکوک ویب لنکس اور غیر ضروری سروسز سے بچیں۔ اس کے علاوہ، اگر کسی صارف کو غیر متوقع چارجز کا سامنا ہو تو وہ فوراً اپنے موبائل آپریٹر سے رابطہ کریں۔

پی ٹی اے نے یہ بھی کہا کہ اگر صارفین کو کسی قسم کی شکایت ہو تو وہ پی ٹی اے کے کمپلینٹ مینجمنٹ سسٹم سے مدد حاصل کر سکتے ہیں۔ ادارہ ٹیلی کام کے شعبے میں شفافیت کو فروغ دینے اور صارفین کے حقوق کے تحفظ کے لیے پرعزم ہے۔