پاکستانی سفارت کاری رنگ لے آئی: امریکا کا قبضے میں لیا گیا ایرانی جہاز 'ایم وی توسکا' پاکستان کے حوالے

اسلام آباد :پاکستان کی مخلصانہ ثالثی اور کامیاب سفارت کاری کے نتیجے میں ایک بڑی پیش رفت سامنے آئی ہے۔ ترجمان دفترِ خارجہ نے تصدیق کی ہے کہ امریکی فورسز نے اپنے قبضے میں لیا گیا ایرانی بحری جہاز "ایم وی توسکا" عملے سمیت پاکستان کے سپرد کر دیا ہے۔
تفصیلات کے مطابق، ایرانی بحری جہاز "ایم وی توسکا" کو امریکی فورسز نے رواں برس اپریل میں ایک کارروائی کے دوران قبضے میں لیا تھا۔ کئی ماہ تک امریکی تحویل میں رہنے کے بعد، اب اسے پاکستان منتقل کر دیا گیا ہے۔ ترجمان دفترِ خارجہ کا کہنا ہے کہ اس منتقلی کا بنیادی مقصد جہاز اور اس کے عملے کو بحفاظت واپس ایران بھیجنا ہے۔

ترجمان دفترِ خارجہ کے مطابق، امریکی فورسز نے اپریل سے اپنے قبضے میں لیا گیا ایرانی بحری جہاز 'ایم وی توسکا' (MV Tosca) عملے سمیت پاکستان کے حوالے کر دیا ہے۔ترجمان دفترِ خارجہ نے تصدیق کی ہے کہ جہاز کے ساتھ موجود عملے کے 22 ارکان کو بھی پاکستانی حدود میں منتقل کر دیا گیا ہے۔ امریکی حکومت کی جانب سے اس منتقلی کو تہران کے ساتھ 'اعتماد سازی کے اقدام' (CBM) کے طور پر دیکھا جا رہا ہے۔
سفارتی ذرائع کا کہنا ہے کہ یہ اقدام نائب وزیراعظم اسحاق ڈار اور ایرانی وزیر خارجہ کے درمیان حالیہ رابطوں اور پاکستان کے "تعمیری کردار" کا نتیجہ ہے۔ امریکا کی جانب سے جہاز پاکستان کے حوالے کرنا اس بات کی علامت ہے کہ واشنگٹن اور تہران دونوں ہی اسلام آباد کو ایک معتبر ثالث تسلیم کرتے ہیں۔
ماہرینِ خارجہ امور اس پیش رفت کو خطے میں جاری کشیدگی کے خاتمے کی جانب پہلا عملی قدم قرار دے رہے ہیں۔ ایران کی جانب سے پاکستان کی ثالثی کو سراہنے کے فوری بعد جہاز کی واپسی، مشرقِ وسطیٰ میں "بیک چینل ڈپلومیسی" کی کامیابی کا واضح ثبوت ہے۔